Taur Esforsu Kadoras Mai TL; Lere Defende Xanana

Primeiru Ministru Taur Matan Ruak. (Foto: Media G-PM)

DILI, STLNEWS.co — Primeiru Ministru (PM), Taur Matan Ruak iha ona planu ba kadoras Greater Sunrise no sei halo esforsu makaas atu kadoras lori mai Timor Leste.

Tuir PM politika VIII governu konstituisional nian ba dezenvovle greater sunrise maka no lori mai Timor-Leste. “Hakarak ka lakohi ita tenke dezenvolve, inplesmente koalia kona-ba greater sunrise, hau sei eskola karik, maibe fuuk mutin mos seidauk espera iha, ainda hau nia jerasaun nia rezultadu sei iha para ida nee, serbisu makas nasaun tomak, povu tomak atu bele dezenvolve rekursu nee, hanoin katak osan neebe mai husi rekursu lori buat barak mai tomak, liu liu jerasaun foin sae sira,” dehan Primeiru Ministru (PM), iha Parlmentu Nasional, Dili,Kinta, (08/10/2020).

Xefe governu nee afirma, dadaun nee governu serbisu makaas hela atu dada mai no iha govenu ida nee nia tempu mak asina akordu ho Australia no halo serbisu lubun ida no kontinua halo.

“Ita nia ambisaun hakarak lori mai mak tau atensaun makas loos, redusaun kursu no presu minarai nian ita boot sira hatene iha tinan hirak liu sentu katorzi ou sentu trezi bidon ida, ohin foin dadaun COVID, vinte ital dollar agora sae kuarenta 40 dolar,” relata PM Taur.

Eis Xefe Estadu nee espera katak mina nia presu diak atu Timor Leste halo investimentu benefisiu ba rai doben TL.

Lere Defende Xanana
Iha fatin seluk Xefe Estadu Maiór Jenerál FALINTIL-Forsa Defeza Timor—Leste (F-FDTL), Majór Jenerál Lere Anan Timur defende politika Lider Karismátiku, Kay Rala Xanana Gusmão hodi mantein dada kadoras Greatar Sunrise mai Timor-Leste.

Nia hatutan politika atu dada kadoras Greater Sunrise neebé Xanana Gusmão luta durante funu too agora, nuudar interese nasionál neebé sei fó benefisiu ba futuru ekonomia nasaun no hadia povu nia moris neebe sei mukit. “Uluk iha ai-laran, katuas Xanana dehan, demokrasia la signifika katak, ema hotu- hotu deside, maibé ema ida deit bele deside ba interese nasionál nasaun nian no ema barak nia mós, tanba ita serbi ita nia povu no serbi ita nia nasaun,” haktuir Lere waomhira partesipa reuniaun inter-ministériál hodi sensibiliza formatu servisu kriasaun Autoridade Maritima Nasionál (AMN) iha salaun enkontru Komandu Jenerál F-FDTL, Fatuhada Dili, (09/10/2020).

Nia akresenta atu lori kadoras mai Timor-Leste tenki kria estabilidade politika, entre lider politiku sira hodi tau aas interese nasaun no tau aas povu nia moris, nee mak importante liu. “Ohin loron ita nia impase politika nee, puruzemplu kona-ba ita nia mina rai, lider balun dehan katak, ba Austrália, lider balun dehan dada mai Timór, mais ita laiha konsesu. Mina nee interese nasionál ida neebé sagradu no boot liu ba povu nia diak no ba nasaun nian diak,” argumenta Lere.

Nia konsidera liña fronteira maritima Timor-Leste nian ohin loron abandona hela, no seidauk koloka forsa atu ba halo seguransa, tanba estabilidade politika iha rai laran afeita servisu hotu- hotu paradu. “Ita nia rikusoin mina Greater Sunrise agora seguransa laiha, tanba nee ita nia governu no estadu tenke konsensu haree ba kestaun interese nasionál ida nee,” katak nia.

Nia hatutan, fronteira tasi Timor Leste manan tiha ona, tanba nee husi ba lider politika sira tenke fó liman ba malu atu solusiona impase nee, tanba krize politika rai laran la rezolve, sei afeta ba futuru nasaun. “Ita tenke hamutuk, labele halo impase politika dada ba dada mai. Se Timór hanesan nee nafatin, ita nia esforsu hotu- hotu sei la vale no sei monu hotu ba rai,” komenta Lere.*

Reportajen: Alberto Menezes/Efizenia da Costa
Editora: Ekipa STL

LEAVE A REPLY

Please enter your comment!
Please enter your name here