Taur: Hau Laiha Komunikasaun Ho Maun Xanana

DILI, STLNEWS.co – Primeiru Ministru Taur Matan Ruak laiha komunikasaun ho lider karismatiko Kay Rala Xanana Gusmão.

Primeiru Ministru Taur Matan Ruak hatoo kestaun Bainhira Remata hasoru malu ho Prezidente Republika Francisco Guterres Lu Olo iha Palasiu Prezidente Bairru Pite Kinta (15/04/2021), hatete nia seidauk halo kontaktu ho Lider karismatiko Xanana Gusmão maibe nia mos fiar katak sira neebe mak iha Sala Integradu Jestaun Krize nee reprezenta Governu mak koalia ho Xanana Gusmão ho familia.

“Hau laiha komunikasaun ho maun Xanana, maibe hau fiar katak sira neebe iha Sala Situasaun nee reprezenta hau hodi koalia ho familia sira ho maun Xanana rasik atu hetan solusaun ida ba ida nee,” dehan PM Taur Matan Ruak.

Ohin mos PM fo ultima solusaun mediku sira deside, tanba iha konsellu Ministru reuniaun mos la koalia konaba ida nee.

“Hau espera katak sira bele hetan solusaun tanba ultimu analiza iha dalan ikus liu buat neebe mediku sira deside ida nee mak vale, tanba ita boot sira hatene, hodi kalan Konsellu Ministru reuniaun too 10 oras, maibe asuntu ida nee ami la trata tanba nee laos KM ninia kompetensia deside ida nee,” hatete nia.

PM mos hatutan espesialista, profesionais saude ida nee mak importante tanba nee Xefe Governu husu atu sira komesa koalia, tanba iha tempu hira nee, Xefe Governu tenta jere pozisaun saude sira nian.

“Labele lori risku mai ita, karik iha aban bainrua iha risku, labele dun hanesan nee Matan Ruak halo sala ka maun Xanana halo sala, maibe ita hotu assume kona-ba nia risku ida aban bain rua, karik iha problema ruma, tamba ita rona istoria hanesan Indonezia neebe sira lori sira nia mate ba fali iha neeba fo hariis, entaun hau tauk loos nee responsabilidade boot nee laos buat ida muito fasil, maibe hau espera katak ita nia profesionais sira bele hetan solusaun ida neebe diak, pur auladu tau ita nia matebian sira nee ho dignidade, maibe outru ladu tambe ita proteze mos sira neebe moris atu labele hetan infensaun ida nee mak hau nia objetivu,” haktuir nia.

Nunee mos ohin mos iha sala izolamentu ekipa konjunta saude husi Sala Situasaun Sentru Integradu Jestaun (SIJK) oras nee mate isin Armindo Borges entrega ona ba familia hodi halo prosesu funebre tuir tradisaun kultura Timor nian.

Bainhira mate isin entrega ba familia Lider karsimatiko Xanana Gusmao mos hatoo agradese ba governu nia komprensaun hodi bele entrega ona mate isin ba familia hodi halot iha Semiteriu Manleuana.

Mate isin nee akompanha direita husi lider karismatiku Xanana Gusmão, deputadu deputada, familia matebian inklui mos populasaun sira seluk halo komboiu husi sala izolamentu too semiteriu Manleuana.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here