DILI, STLNEWS.co – Primeiru Ministru Taur Matan Ruak, hanesan mos Prezidente Partidu PLP, neebe apoia kandidatu Prezidente Republika (PR), Francisco Guterres Lú Olo, la prontu simu derota, karik Ramos Horta eleitu disolve parlamentu mak haree.
“Hau garante katak Lú Olo sei manan, tanba ami la prepara ba lakon, maibe prepara aan ba manan iha eleisaun segunda volta, tan nee hau seidauk hatene atu derota, tanba hau hatene Lú Olo manan,” dehan Primeiru Ministru Taur Matan Ruak ba jornalista Tersa nee (19/04/2022), wainhira ezerse nia votus iha Sentru Votasaun Eskola Primária Metiaut, Dili.
Nia afirma liu tan, kandidatura Lú Olo iha nia programa barak atu ajuda governu dezenvolve no hadia mos povu nia moris.
Tuir observasaun STL iha terenu haree katak, Primeiru Ministru Taur Matan Ruak too iha sentru votasaun Eskola Primaria Metiaut ho kareta privadu metan, no akompanha husi eskoltu sira, aleinde nee espoza PM Taur la mai hamutuk ho PM, tanba nee PM lao mesak.
Iha eleisaun primeira ronda, PM Taur mai hamutuk ho nia espoza hodi ezerse votus iha Eskola Metiaut, ohin PM mai mesak iha sentru votasaun nee.
Iha sentru votasaun nee akompanha husi Sekretariadu Tékniku ba Administrasaun Eleitoral (STAE), Komisaun Nasional ba Eleisaun (CNE – sigla portugues), observador nasional no internasional, no seguransa masimu husi Polisia Nasional Timor Leste (PNTL).
(mad/gui)
