Taur: Osan Adisional Ba Roo Haksolok Kompetensia PN

Primeiru Ministru (PM) Taur Matan Ruak (Foto: Gabineti Primeiru Ministru)

DILI, STLNEWS.co – Relasiona ho orsamentu adisional neebe mosu iha livru Orsamentu Jeral Estadu (OJE) tinan fiskal 2021 ho totál tokon US$16.9 ba Roo Haksolok maka Primeriu Ministru (PM) Taur Matan Ruak hatete ida nee kompetensia Parlamentu Nasional maka deside.

Primeriu Ministru (PM) Taur Matan Ruak hatoo kestaun nee ba jornalista bainhira remata hasoru malu ho Prezidente Republika Francisco Guterres Lú Olo iha Palasiu Prezidente, Bairru Pite, Kinta (26/11/2020).

“Hau hanoin diskusaun nee sei halo iha PN no PN mak sei deside, katak orsamentu tokon US$16.9 nee mantein ka sai nee depende ba parlamentu. Agora autoriedade Rejiaun Administrasaun Espesial Oecusse Ambeno (RAEOA) hakarak prosesu nee kontinua lao ba oin nee tenke tau osan, maibe ba PN mak haree took,” dehan PM Taur.

Iha biban nee PM hatutan relasiona ho deklarasaun Xefe Estadu Maior Jeral F-FDTL, Maijor Jenerál Lere Anan Timur kona-ba governu presiza ukun too iha baze, Primeriu Ministru (PM) Taur Matan Ruak dehan rejista ona preokupasaun sira nee.

“Liurai sira iha Ministeriu Administrasaun Estatal (MAE) nia okos, laos Primeiru Ministru mak komanda liurai sira, maibe MAE mak tau matan ba liurai sira, tanba nee hau rejista preokupasaun, atu MAE no Administrador sira kontinua tau matan ba liurai sira, tanba nee tuir eskalaun ka lae,” dehan PM Taur.

PM dehan labele ba hamoos estrada mos Primeriu Ministru (PM) mak ba, depois ba ukun iha suku, nee laos, ida-ida iha ninia responsabilidade atu kumpri.

Iha loron hirak liu ba Komandante F-FDTL Lere Anan Timur mos dehan, xefe suku barak mak mai pasiar no buka de’it projeitu iha Dili, maibé laiha responsabilidade ba povu iha baze.

“Governu tenki ukun too baze ka too kraik, labele abandona iha kraik, preokupa de’it iha leten, tanba ami haree ba nee koalia kona-ba estabilidade nasional tenki mai husi baze,” dehan Lere*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here