Taur: Trabalhador Mak Eroi Ba Dezenvolvimentu

DILI, STLNEWS.co – Primeiru Ministru (PM) Taur Matan Ruak hateten, dezenvolvimentu iha nasaun lao diak, tanba liu husi esforsu trabalhador sira nian.

Iha loron 1 fulan Maiu tinan nee, mundu tomak no Timor Leste mos selebra loron internasional trabalhador nian, neebe komunidade katolika mos selebra nudar loron Saun Jose Operariu nian, ho objetivu atu rekonhese no valoriza knaar trabalhador sira nian iha sosiedade.

“Trabalhador sira nudar eroi foun sira iha faze dezenvolvimentu nasional, daudaun nee nian no liu husi sira mak ita harii nasaun ida neebe forti riku no seguru,” informa Xefi Governu liu husi komunikadu media Gabineti PM neebe STL asesu iha Domingu nee (01/05/2022).

Loron tabalhador nian laos deit feriadu ka loron deskansa nian ida, maibe sai nudar biban ida neebe diak tebes-tebes atu hahi empenhu, meritu, disiplina, profisionalizmu, servisu iha ekipa, espiritu sakrifisiu nian no kumprimentu dever nian, neebe horik nafatin iha trabalhador sira tantu nasional no estranjeiru sira.

Tanba liu husi setor oin-oin i ekonomia Timor Leste no administrasaun publika, neebe kontribui makaas ba produtividade, nunee nasaun bele hakat ba oin iha ritmu neebe diak.

Tanba trabalhador sai nudar bensaun no rikusoin loloos ida husi família, komunidade, empreza, instituisaun ka nasaun ida, justu duni atu selebra ezemplu diak liu sira konaba servisu no exelensia, hanesan fonte enkorajamentu no inspirasaun nian hodi hasoru dezafiu sira husi dezenvolvimentu.

“Ba trabalhador Timor oan no estranjeiru hotu-hotu neebe kontribui ho laran tomak ba Timor Leste ida neebe modernu, dezenvolvidu no prosperu liu tan, hau hakarak tebes hodi hau nia naran rasik no governu nia naran, hatoo ami nia agradesimentu neebe boot tebes-tebes,” tenik Xefi Governu nee.

(alb)

LEAVE A REPLY

Please enter your comment!
Please enter your name here