TDD Absolve PM Nain 2 Husi Krime

DILI – Tribunal Distrital Dili absolve hikas arguidu Jose da Costa Soares no Cesario Ximenes nudar Polisia Militar husi krime ameasa no ofensas integridade fisika, tanba lezadu hakarak dada hikas kazu refere.

Liu husi audensia julgamentu tribunal hatete, baseia ba akordu neebe mak lezadu no arguidu sira halo iha defensor publiku katak lezadu Joao Evaristo hakarak eziste fali kazu refere hodi dame malu ho arguidu sira. Tanba nee lei fo dalan atu homolonga hikas kazu nee husi buletin de krime.

Iha biban nee Ministeriu Publiku hatete, tanba lezadu mak hakarak dada fali kazu nee no hakarak atu dame malu ho arguidu sira, parte MP husu ba tribunal atu homolonga fali keisa nee no absolve arguidu sira husi krime neebe akuza ba sira.

Entretantu parte defesa mos konkorda ho parte Ministeriu Publiku katak, tanba lezadu mak hakarak eziste fali keisa nee parte defesa husu ba tribunal atu absolve arguidu sira husi krime neebe mak MP akuza ba sira nain rua.

Nunee tribunal homolonga hikas kazu nee husi bulletin de krime no absolve arguidu sira. Audensia nee prezide husi Juiza Zulmira Auxiliadora, reprezenta Ministeriu Publiku Prokurador Antonio Tavares da Silva no arguidu sira hetan assistensia legal husi advogadu privadu Paul Remidios. Informasaun kompletu iha STL Jornal no STL Web, edisaun Kuarta (28/9/2016). Domingas Gomes

 

 

LEAVE A REPLY

Please enter your comment!
Please enter your name here