DILI, STLNEWS.co – Governu liu husi Administrativu Munisipiu Dili (AMD) sei haruka tekniku jardinazen no tekniku jestaun semiteriu nain 4 ba Portugal hodi tuir formasaun.
“Ita haree durante nee ekipa AMD nian ladun hatene atu halo jardin hanesan neebe, nunee presiza aumenta sira nia konhesimentu oinsa atu servisu hodi kuidadu no halo jardin matak,” dehan Prezidente Autoridade Munisipiu Dili (PAMD), Guilhermina Filomena Saldanha ba STL iha Munisipiu Dili, Tersa (27/06/2023).
Nia dehan, objetivu husi formasaun nee atu aumenta no hasae kapasidade tekniku sira nian, no oinsa bele halo jardin ida matak no fresku iha sidade ida.
Nia esplika, tekniku jardinazen nain rua ho tekniku jestaun semiteriu nain rua hamutuk nain haat, neebe daudaun nee tuir hela formasaun konaba lian Portugues nian iha Timor, iha Setembru nee.
“Ita haruka sira nian haat nee sei aranka no sira mak sei sai formador ba area jerdinazen no semiteriu nian,” nia esplika.
Maibe nia informa, ekipa husi Portugal mos sei mai ajuda no observa atividade iha jardin iha Timor-Leste, tanba TL nee iha iklima rua deit, no Portugal iklima haat. Entaun sira hatene ona atu tau ahi oan ida neebe iha sidade Dili.
Iha fatin hanesan, Akademista UNTL Carlina dos Santos Fereira esplika, governu atu halo jardin neebe fresku ho afinan neebe fresku, nee presiza ema tekniku neebe eskola ba iha area ida nee.
“Ita haree jardin sira neebe iha sidade Dili la fo ambiente neebe saudavel, tanba ita haree jardin sira nee maioria ai funan fresku laiha no ambiente mos la saudavel, tanba nee presiza ema neebe kursu ida nee duni mak bele hadia jardin sira nee,” nian deklara.
(jen)
