DILI, STLNEWS.co – Funsionariu hosi Kompanhia Telekomunikasaun Telemor hamutuk ho funsionariu sira husi Banku Mandiri, Dili, Timor Leste, neebe lidera hosi Branch Manager Bank Mandiri Dili, Gefrial S.H Panjaitan no Diretor Departamentu Administrasaun Telemor, Mr. Karrot, halao limpeza iha fatin turistiku Cristo Rei.
“Telemor ho Banku Mandiri ninia inisiativa halao limpeza iha fatin turistiku Cristo Rei nee atu motiva Timor-oan sira, liu-liu foin sae no joven sira iha konsensia hodi hamos ka halao limpeza, nunee fatin nee sai furak liutan atrai turista hosi rai laran no rai liur bele vizita fatin ida nee,” katak Diretor Departamentu Administrasaun Telemor, Mr. Karrot ba STL iha Cristo Rei, Sabadu (30/9/2023).
Nia mos dehan katak Cristo Rei laos deit fatin turismu, maibe sai mos hanesan rekursu ida ba Timor Leste. Tamba nee, atividade limpeza neebe Telemor ho Banku Mandiri halao nee atu fo motiva ba organizasaun juventude no organizasaun sira seluk bele iha konsensia hamos fatin ida nee sai furak liutan.
“Espera katak IX Governu mos bele dezenvolve fatin turistiku nee diak no furak liutan hodi atrai turista rai laran no rai liur vizita ikon Timor Leste nee,” tenik nia.
Entretantu, Branch Manager Bank Mandiri Dili, Gefrial S.H Panjaitan hateten atividade limpeza neebe Banku Mandiri ho Telemor halao nee pozitivu tebes, maske la dun boot, maibe bele motiva sira seluk iha konsiensia no fo atensaun ba fatin turistiku ida nee.
“Atividade limpeza neebe Telemor no Banku Mandiri halo nee pozitivu tebes, maske la boot, maibe liuhosi atividade kiik oan nee, bele mos motiva sira seluk atu iha konsiensia ba fatin ida nee,” katak Gabriel Panjaitan.
Ba pesoal, Gabriel Panjaitan hare katak Cristo Rei hanesan ikon Timor Leste neebe presiza hadia iha area ambiente nee tenke mos nomos infrastruktur presiza dezenvolve diak liutan.
“Hau hanoin IX Governu iha programa kona ba ida nee, espera katak iha mandatu governu ida nee bele dezenvolve Cristo Rei nee sai furak liutan hodi atrai turita rai laran no turista hosi rai liur,” dehan Gabriel Panjaitan.
Tuir observasaun STL nian iha terenu hatudu katak foer barak butuk iha fatin turistiku ida nee no hare hosi infrastruktura presiza Governu tau matan, tanba fatin ida nee sai ikon Timor Leste nian.
(car/mik)
