Tenke Louva Servisu Frontline

Deputada Bankada PD, Elvina Souza. (Foto: Espesial)

DILI, STLNEWS.co – Ema hotu tenke louva frontline nia servisu, tanba sira luta hasoru Covid-19 iha rai laran.

Deputada Bankada PD, Elvina Souza hatete, frontline sira ho vontade, sakrifisiu halao duni servisu, maibe responsabilidade governu nian liu-liu ministeiru relevante atu haree.

“Ita hotu-hotu tenke louva servisu frontline sira nian, maibe ita hotu hatene iha tempu kotuk ba iha ona subsidiu no termina ona subsidiu hira mak sira hetan, hau hanoin ida nee frontliner sira merese hetan rekonesimentu ba servisu sira neebe sira halo,” dehan nia ba jornalista sira, iha PN, Kinta (11/03/2021).

Nia hatete, bainhira koalia konaba frontliner nee koalia mos konaba familia tomak, no husik hela sira nia familia hodi ba halo sira nia servisu, maski ema hotu hatene servisu todan i risku ba sira nia vida.

Maski dalaruma ho ekipamentu protesaun neebe menus halao sira nia servisu ho buat neebe iha nee lamentavel tebes.

“Ita labele kestiona frontliner sira nia paisaun ba servisu neebe sira iha, katak sira halao servisu bazeia ba sira nia esperensia i bazeia mos ba sira nia paisaun neebe iha,” tenik nia.

Nia akresenta, preokupasaun servisu frontline sira nian neebe iha, Deputadu sira sei koalia iha Parlamentu Nasional hodi ezije nafatin atu tau atensaun liu-liu, ba subsidiu neebe merese duni tuir sira nia dedikasaun neebe halo ona.

“Importante pagamentu ba saida deit tenke lao ho loos, tanba hanesan membru parlamentu i hau mos ema neebe vota afavor ba orsamentu, hatene katak osan nee iha hein atu ejekuta deit,” hatutan nia.

Iha fatin hanesan, Xefe Bankada Fretilin, Francisco Miranda Barnco dehan, orsamentu neebe governu ejekuta dadauk ba iha servisu lina frente hodi luta ba kombate Covid-19, liu-liu ba servisu seguransa, sanitarius ho entidade sira hotu neebe iha lina frente, hodi kombate hasoru covid-19 sira hetan direitu ba ida nee.

“Entaun hau hanoin parlamentu mos sempre koalia bebeik ona, tanba sira agora iha momentu ida neebe defisil karik iha situasaun nee, eskala boot liu tan i sira mos tenke servisu makas liu tan. Entaun governu tenke halo atendimentu ida nee lalais ho tempu, para sira mos labele lakon sira nia animu servisu,” dehan nia.*

Reportajen: Domingas Soares/ Guilhermina Franco
Editora: Carme Ximenes

LEAVE A REPLY

Please enter your comment!
Please enter your name here