DILI, STLNEWS.co – Prezidensia Republika husu adisional hamutuk rihun US$ 132 husi Orsamentu Jeral Estadu (OJE) tinan 2022 ba Komisaun Revizaun Orsamentu Politika (KROP).
Tuir Xefe Kaza Sivil Prezidensia Republika, Fransisco de Vanconselos katak, orsamentu neebe mak Prezidensia republika husu husi inisiu mais tokon US$ 10 resin, maibe Komisaun Revizaun Orsamentu Politika la konkorda no deside hodi hatuun ba iha tokon US$ 9 resin.
Maibe haree ba problema neebe mak dadaun nee Prezidensia republika infrenta, liu – liu konaba kareta operasional neebe mak dadaun nee, kuaze nia tempu uza liu ona tinan lima ba leten, nunee presiza halo manuntesaun no hola tan kareta foun balun.
“Ami haree katak presiza husu aumenta tan rihun US$ 132 no la to’o tokon US$ 10 para troka kareta operasional sira neebe mak nia tempu uza liu ona tinan 5, no uluk ita hatene katak viajen neebe mak lao ladun diak, tanba nee ami tenta masimu atu hadia kareta sira nee, maibe ami lakonsege ona, nunee iha tinan oin kareta operasional sira nee presiza hadia,” dehan Fransisco de Vanconselos iha edifisiu Ministeriu Finansas, Aitarak – Laran, Segunda nee (13/09/2021).
Nia dehan, kareta operasional uluk iha 70 armada, maibe kareta sira nee balun nia tempu uza liu ona tinan 5 no tinan 7 nomos balun liu ona tinan 10, no foin lalais iha inundasaun loron 4 fulan Abril liu ba afeita mos ba kareta sira operasional balun neebe mak nia kondisaun la diak ona, tanba nee mak kaza Sivil propoin atu sosa tan kareta tolu (3), ida ba kaza militar uza ba mobilizasaun seguransa nian, no rua ba kaza sivil.
Iha biban nee nia mos informa, ezekusaun orsamentu iha Prezidensia Republika dadaun nee atinje ona 43%.*
Reportajen: Alberto Menezes
Editor: Ekipa STL
