Timor Leste Lakon Funu Nain Mauhuno Bulerek

DILI, STLNEWS.co – Timor Leste lakon ona funu nain, José António Gomes da Costa alias ‘Mauhunu Bulerek Karathayano’. Nia hakotu iis iha Hospital Nasional Guido Valadares (HNGV) Dili, Sesta (24/9/2021) tuku 17:30 OTL, tanba ataka kurasaun.

Tuir informasaun neebe rekolla iha mate uma Pantai Kelapa, Dili, durante nee matebian sofre moras komplikasaun. Matebian mos foin lalais nee halao tratamentu iha Izolamentu Vera Cruz.

Iha loron Domingu (19/09/2021) derepenti hetan atakasaun no familia transporta ba halo tratamentu iha Sala Unidade Kuidadu Intensivu (ICU – sigla Ingles) too hakotu iis.

Hosi HNGV Dili, familia transporta mate isin Mauhuno ba nia rezidensia iha Praia dos Coqueiros (Pantai Kelapa), Díli.

Tuir observasaun jornalista STL, iha rezidensia matebian Mauhuno hatudu katak familia, parentes, kolegas, amigu no veterana/veteranus, membru governu, membru Parlamentu Nasional nadodon hanesan Vise Primeiru Ministru no Ministru Planu no Ordenamentu, Jose Reis, Sekretariu Estadu Protesaun Sivil, Joaquim Jose Gusmão dos Reis Martins, eis Prezidente Parlamentu Nasional (PPN), Aderito Hugo no lider Partidu CNRT nian hanesan Virgilio Smith “Kranik”, Tomas Cabral no sel-seluk tan mai iha mate uma hodi hatoo sentimentu kondolensia profunda ba familia enlutada Mauhuno.

Iha kalan nee kedas familia sira dada lona iha uma oin no monta eletrisidade. La hanesan bai-bain, iha mate uma ema tanis, maibe iha mate uma situasaun hakmatek laiha ema tanis.

Ho Mauhuno nia mate, Konsellu Ministru (KM) liu husi reuniaun estraordinariu aprova ona votus pezar no rezulusaun governu hodi dekreta lutu nasional ba falesimentu Mauhunu Bulerek Karathayano.

Reuniaun Estraordinariu KM neebe halo iha loron 24 Setembru 2021, aprova ona votus pezar no dekreta mos rezulusaun Governu nian konaba lutu nasional ba Saudozo Eis Komandante FALINTIL José António Gomes da Costa neebe konesidu ho naran revolusionáriu Mauhuno Bulerek Karathayano.

Iha prosesu luta ba ukun rasik aan, Saudozo Mauhuno asumi kargu Sekretáriu Komisaun Diretiva FRETILIN nian no atualmente Primeiru Vise Prezidente Partidu CNRT.

Mauhuno Bulerek Karathayano, moris iha 14 Abríl 1949. Matebian hanesan mós Komandante FALINTIL ida neebé lao hamutuk ho Komandante Em-Xefe, Kay Rala Xanana Gusmão dezde 1975 too 1999.

Iha 1987, Mauhuno assume kargu hanesan Sekretáriu Komité Ezekutivu FRETILIN, hafoin Xanana Gusmão lori FALINTIL sai hosi FRETILIN hodi harii Congreso Nacional Resistência Maubere (CNRM) nuudár organizasaun rezisténsia Timor-nian iha 1988.

Iha Maiu 1990, Mauhuno hetan fiar nuudár Sekretáriu Jerál FRETILIN, bainhira Xanana Gusmão hetan kapturasaun husi forsa espesial Indonesia nian ka KOPASSUS neebe lidera husi Kolonel M. Simbolon iha 20 Novembru 1992. Nunee, Mauhuno asume kargu nuudar Komandante FALINTIL too 5 Abril 1993.

Ikus mai Mauhuno hetan kapturasaun husi forsa Indonezia no hetan torturasaun hosi militar Indonezia too livre iha 1995.

Iha 2013, Mauhuno envolve iha Partidu Congresso Nacional Reconstrução Timorense (CNRT) neebe lidera hosi Kay Rala Xanana Gusmão. Iha 2017, Mauhunu eleitu nu’udár Vise-Prezidente CNRT.

Eis Prezidente Parlamentu Nasional, Aderito Hugo da Costa, hateten katak Timor Leste lakon ona funu nain Saudozo Mauhunu Bulerek. “Ita hotu triste tanba lakon funu nain ida. Matebian Mauhuno moras kleur ona, matebian moras depois de referendum,” dehan Aderito.*

Reportajen: Mikael Mali Mau/Crisogono Magalhães
Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 20 Outubru: Kazu Foun Hamutuk 16

DILI, STLNEWS.co - Ohin loron Sentru Integradu Jestaun Krize (SIJK) rejistu kazu foun hamutuk 16, iha Dili 14 no munisipiu seluk iha nain 2. "Kazu...

Membru F-FDTL Foun Ida Halai Lakon

DILI, STLNEWS.co - Membru foun FALINTIL Forsa Defeza Timor Leste (F-FDTL) ida ohin halai lakon iha sentru formasaun Metinaro tanba la augenta ho instrusaun...

Maromak La Dukur Ba Nia Ema

DILI, STLNEWS.co - Maromak mak iha kbiit tomak sempre akompanha ema hotu iha tempu saida deit no nunka dukur ba ema, tanba ne'e presiza...