DILI, STLNEWS.co – Iha tempu besik Governu Timor Leste liu husi Sekretariu Estadu Formasaun Profesional Empregu (SEFOPE) sei haruka Timor oan nain 12 ba servisu iha Japaun, iha area agrikultura nian.
“Tempu besik ita sei haruka tan Timor oan nain 12 ba servisu iha Japaun, Timor oan sira nee tuir ona formasaun lian Japaun nian iha sentru formasaun balun, tanba nee ita sei haruka uluk nain 12 ba, hafoin ida nee mak aumenta tan, maibe konforme merkadu Japaun husu,” lia hirak nee fo sai husi Diretor Jeral, SEFOPE, Paulo Alves ba STL, Domingu nee (06/08/2023) liu husi Telfone.
Nia afirma, sira nain 12 nee ba sei tuir tan formasaun iha Japaun durante tinan ida, karik sira nia skil diak ona mak foin servisu, tanba nee SEFOPE liu husi Sentru Formasaun neebe iha, nafatin kapasita Timor oan sira, karik merkadu rai liur husu mai mak hein aloka ba deit.
Tan nee ba servisu iha Japaun, foin hahu uluk ho sira nain 12, pois mak haruka tan ba, tuir merkadu rai liur husu, tanba nee papel governu nian nafatin kapasita ema, hodi prepara ba merkadu rai liur nomos rai laran.
(mad)
