DILI, STLNEWS.co – La kleur tan Timor Leste sei selebra tinan 20 ba restaurasaun independensia iha loron 20 fulan Maiu tinan 2022, tanba nee Timor oan hotu tenki valoriza loron nee, tanba Timor oan barak fakar raan no ruin too hetan independensia.
Tuir Veteranus Ete Ucu Guterres ba STL iha nia knaar fatin Balide, Kinta nee (12/05/2022)
“Haree ba komemora loron 20 fulan Maiu nee loron importante ba ita hotu i loron istoriku, tanba nee Timor oan tenki hatene katak, ohin loron ita independensia mai husi prosesu naruk sosa ho raan no ruin, nee duni ita hotu tenki fo valor ba loron ida nee, tanba loron nee Timor oan barak fakar ba rai ida nee,” katak Veteranus Ete Uco Guterres.
Nia hatete, komemorasaun loron 20 fulan Maiu ba dala 20, i loron ida nee mos bele fo hatene ba mundu katak, Timor independensia mai ho istoria rasik. Tanba nee mensajen ba Timor oan hotu katak, loron 20 fulan Maiu presiza dignifika, tanba sosa ho raan no ruin, too balu inan feton sira barak mak sai feto faluk no oan kiak, tanba luta ba independensia, tanba nee nudar Timor oan tenki fo valor ba rai ida nee.
Iha parte seluk, Deputadu husi Bankada FRETILIN, Fabião Oliveira hatete, ho selebrasaun loron 20 fulan Maiu nudar loron importante ba povu Timor Leste, i loron nee mos ema hotu hatene Prezidente Republika (PR) eleitu sei simu tomada de pose, i PR foun ida neebe demokratikamente eleitu husi povu ho hotu-hotu respeitu, tanba demokrasia mak nunee.
“Ho loron 20 fulan Maiu nee fo espasu foun, tanba ita iha PR foun, mezmu PN mak sei nafatin, sei halao eleisaun iha tinan 2023, espera ho koordenasaun no ligasaun hanesa orgaun soberania 4 nee sei iha kooperasaun servisu hamutuk, hametin unidade nasional iha lina kordenasaun ho entidade hotu, atu nunee hametin nafatin uma luluik Timor nian, atu ai-riin metin nafatin hodi fo ezemplu diak ba jerasaun foun sira,” katak reprezentante povu nee.
(gui/dom)
