Tinan 1 Meza PN Rahun, CNRT Lutu Ba Masakre Hasoru K-RDTL

DILI, STLNEWS.co – Ohin kompleta tinan ida meza Parlamentu Nasional (PN) rahun, bankada CNRT hatudu sentimentu tristeza hodi hatais metan, tanba konsidera masakre hasoru Konstituisaun da Republika demokratiku de Timor-Leste (K-RDTL).

Liu husi konferensia imprensa, Deputada Bankada CNRT, Terezinha Viegas hatete, ohin loron 19 de Maiu, bankada CNRT fó hanoin hikas ba povu tomak kona ba istória nakukun iha loron 19 de maiu de 2020. Ohin, halo tinan ida asaltu de poder neebe halo foer istória Timor Leste, núdar estadu de direitu demokrátiku, desde restaurasaun independênsia iha 20 de maiu de 2002.

“Iha loron 18 no 19 de Maiu de 2020, bainhira partidu FRETILIN, KHUNTO no PLP halo manobras oi-oin no konsege asalta poder iha PN. Asaun hadau poder nee, ita bele konsidera hanesan masakre ida ba Estadu de Direitu Demokrátiku de Timor-Leste, husi neebeninia konsekuênsia povu tomak mak sente to’o ohin loron. Masakre ida nee hetan apoiu husi membrus polísia balun, hodi sama rahun tiha dignidade Timor Leste nian, iha nasoens demokrátikas sira-nia oin, iha mundu rai klaran,” deklara deputada CNRT nee iha konferensia imprensa Kuarta (19/05/2021) iha PN.

Nia dehan, konstituisaun RDTL, iha artigu 99, numeru 3, regula momos katak PN halibur, tuir konvokasaun husi Prezidente Parlamentu. Atu reforsa artigu 99, iha ni-nia numeru 3, rejimentu PN nian rasik mos, iha artigu 17, sita ho klareza katak Prezidente PN mak iha kompetênsia atu prezide meza, atu organiza sesaun plenária no admite ka rejeita projetu ka proposta de lei atu bá plenária.

Maibe tuir nia, tanba polítikus balun ambisaun, hamrok ba poder, mak iha loron 19 de Maiu de 2020, liu husi Vice PN, Estadu hasoru violasaun ba K-RDTL, iha ninia artigu 99, violasaun ba lei kona ba organizasaun, funsionamentu no administrasaun parlamentar, ka LOFAP, iha ninia artigu 7, no tan violasaun ba rejimentu PN, iha artigu 17 no 22, katak vise PN, laiha kompetensia atu prezide meza ka atu konvoka plenária.

“Asaun ida nee, lori Timor-Leste tama liu tan ba krize polítika konstitusional, liu husi kontinuasaun ba ezistênsia VIII Governu, neebe viaviliza. K-RDTL la prevê Governu “viabilizadu” ka “Governu ai-tonka”, maibé tanba ambisaun no ganânsia ba poder husi polítikus sira, maka ikus mai, bele viabiliza mos violasaun ba K-RDTL, hodi Governu ida nee bele kaer nafatin ukun,” tenik nia.

Nia afirma liu tan, akontesimentu iha 19 de Maiu de 2020 hatudu ba mundu tomak katak ambisaun husi Partidus Furadores ba Konstituisaun, agora lori hikas Timor-Leste fila ba kondisaun Estadu frájil, frájil iha polítika, frájil iha aspetu sosial, frájil iha demokrasia no iha seguransa, hodi nunee prosesu konstrusaun Estadu fila fali ba kotuk.

Aktu asaltu poder iha tinan kotuk, halo Timor-Leste lakon tiha konfiansa husi mundu, iha aspetu demokrasia, iha lei no ordem, tanba K-RDTL neebe lo-lós sai hanesan ran no klamar ba estadu direitu demokrátiku, lakon tiha nia valor.

Hatan ba kestaun nee Francisco de Vasconcellos, deputadu PLP nudar bankada governu, katak, sira dehan ohin loron ba hadau poder, maibe atu hatete, PN nia poder 3 deit, fiskalizasaun, halo lei no desizaun politika, neebe ohin deputadu hotu iha PN nia poder sei nafatin.

Nia konta, liga mosaun destituisaun de meza, atu sae ba PPN nee hetan konfiansa husi aliansa maiuria parlamentar. Bainhira ses husi aliansa maioria parlamentar nee signifika sira rasik mak sai, klaru katak kuandu sai iha bloku seluk mosu tenke substitui ona ida sai nee.

“Bankada CNRT sira rasik sumba tiha orsamentu, sira deklara atu obriga PR hodi desolve tiha PN, atu hodi lori ba fali eleisaun, neebe lutu sira nian nee ba sira nia komportamentu rasik”, katak deputadu PLP Vasconecllos.

Nia esplika, PPN laos eleitu husi povu, maibe eleitu husi bloku maioria parlamentar, neebe kuandu PPN laorganiza ona plenaria nee tenke aprezenta ona karta destituisaun, tanba deputadu sira laiha komfiansa ona.

Nia kestiona, tuir lolos sira tenke halo reflesaun ba sira nia pekadu boot ba sumba osan iha tinan 2019, nunee mia iha 2020 debate OJE sira abandona plenaria, neebe lalika dehan loron ohin hadau poder nee lae, neebe sira mak tenke halo reflesaun ba sira nia pekadua durante nee sira halo.*

Reportajen: Guilhermina Franco
Editora: Domingas Gomes

LEAVE A REPLY

Please enter your comment!
Please enter your name here

NEWS UPDATE

Lori Maromak Nia Domin Ba Ema Hotu

DILI, STLNEWS.co - Nuudar sarani neebe diak iha moris, tenke sai valeta ba ema hotu, atu lori Maromak nia grasa no domin ba maun...

Vota Abstensaun Myanmar, TL Laiha Sentimentu Humana

DILI, STLNEWS.co - Relasiona ho Ministra Negosoiu Estranjeiru no Kooperasaun (MNEK), neebe mak vota abstensaun ba nasaun Myanmar, akademista konsidera Timor Leste laiha sentimentu...

SEKoop Apoiu Komunidade Afetadu Inundasaun 253

DILI, STLNEWS.co - Governu liu husi Sekretariu Estadu Kooperativa (SEKoop), fo apoiu nesesidade bazika ba komunidade sira neebe maka hetan afetadu husi inundasaun iha...
%d bloggers like this: