DILI, STLNEWS.co – Timor Leste daudaun nee atu tama ona ba tinan 20 restaura nia independensia, maibe povu Timor kontinua moris halerik iha ukun aan nia laran.
Kestaun nee hato husi Hugo Lorenço da Costa, Visi Reitor III Asuntu Estudantil, Universidade Dili (UNDIL) ba STL iha nia knaar fatin Maskarenhas, Dili, Tersa nee (03/05/2022).
“Tempu too ona ita hamaran povu nia matan ween, maibe too agora ita 20 anos ona atu restaura ita nia independensia, ita sei konkretiza no valoriza mehi nee iha vida sosial no ekonomia,” hatete Visi Reitor nee.
Nia relata, iha tinan 19 hafoin ukun aan, lider no ukun nain sira la solidu hodi kria kondisaun diak ba nia povu.
“Hau hanoin depois tinan 19 restaura ita nia independensia, iha dezafiu boot ida mak Timor Leste hasoru, hafoin ita nia lider revolusionariu sira susesu liberta patria, iha tinan rua atu ba tolu ona ita tama iha krizi politika neebe naruk, hau bele dehan ida nee hanesan krizi institusional, tanba ita nia orgaun estadu sira la solidu hodi kria kondisaun neebe diak ba povu, hafoin libertasaun patria,” katak Hugo.
Akademista nee konta tuir, antes nee iha luta libertasaun patria orgaun tolu Frente Armada, Frente Diplomata no Frente Klandesntina sira solidu tebes, maibe iha tempu ukun aan nee sira komesa hadau malu ba poder ikus povu mak sai vitima.
(cri)
