DILI, STLNEWS.co – Daudaun nee Timor-Leste prepara aan atu adere ba membru ASEAN, Sosiedade Sivil oberva setor privadu sira seidauk iha kbiit kapital natoon atu halo kompetisaun.
Lia hirak nee hatoo husi Diretor Ezekutivu FONGTIL ,Valentin da Costa Pinto, katak daudaun nee FONGTIL ho ninia membru sira observasaun, nota ezistensia ASEAN nian neebe lao liu ona tinan 50, maibe iha nivel rejional iha situasaun neebe kontinua akontese mak dezigualdade, nasaun membru sira kontinua ukun ho liman besi neebe la promove konaba demokrasia no la respeitu demokrasia no direitu umanu neebe kontinua lao.
“Ita nia aktus esplorasaun ba trabalhador migrante sira kontinua akontese iha nasaun membru tuan sira nee, agora saida mak ita haree ba ita nia rai laran, se bainhia ita adere ona ba ASEAN, signifika ita tama ona ba merkadu livre, maibe saida mak ita haree, ita nia setor privadu sira ninia kbiit kapital seidauk natoon atu bele halo kompetisaun,” dehan nia ba STL iha nia knaar fatin, Kaikoli, Dili, Tersa nee (26/07/2022).
Nia hatutan, ita nia setor infraestrutura baziku sira neebe bele apoiu dezenvolvimentu nee lao seidauk natoon, hanesan estrada, hotelaria no sasan neebe bele hatudu katak, Timor-leste prontu ona nee seidauk natoon.
(san)
