TL Labele Sai “Sentru Lixu”

Vice Prezidente Parlamentu Nasional (PN) Maria Angelina Lopes Sarmento. (Dok: STL)

DILI, STLNEWS.co – Vice Prezidente Parlamentu Nasional (PN) Maria Angelina Lopes Sarmento fo hanoin ba governu no povu Timor Leste tomak sobre sasan importasaun.

“Hau fo hanoin ba governu no povu tomak katak, Timor Leste (TL) labele sai fatin sentru lixu ba importasaun hahan sira neebe liu ona prazu,” hatete Maria Angelina Lopes Sarmento iha plenaria PN, Tersa (20/10/2020).

Nia husu governu presiza halo dadus. Tinan ida komunidade konsumu protein ka naan, prosentaje hira. Nee tenki klaru. La presiza importa naan husi railiur.

Nia fo exemplu hanesan, deho no naan manu, fabrika neebe produs deho no naan manu nee, fatin fabrika saudavel ka lae. “Hahan hirak nee, ema suplay deit mai. Ita hein simu deit, saudavel ka lae, ita hein konsumu deit. Maibe ita labele halo Timor Leste sai nuudar sentru lixu. Sasan neebe liu tiha ona prazu, ita simu deit, konsumu deit,” hatete Maria Angelina Lopes Sarmento.

Maibe tuir nia haree, agora emprejaria lokal sira komesa produs ona naan manu: broller. Ida nee bele substitui ayam potong husi railiur neebe lagarante, ayam potong nee saudavel ka lae.

Nomos, sira oho manu horibainhira, ninia enpakotamentu horibainhira, bele garante ba ema nia saude ka lae. Durante importa mai, asegura ninia temperatura ka lae.

Nia husu governu labele asegura deit ema asesu ba hahan. Tenke asesu mos ba hahan neebe saudavel.*

Reportajen: Domingas Saores
Editor: Ekipa STL

LEAVE A REPLY

Please enter your comment!
Please enter your name here