TL Seidauk Preparadu Adere Ba ASEAN

DILI, STLNEWS.co – Organizasaun Sosiedade Sivil konsidera Timor Leste seidauk preparadu atu sai membru permanente ASEAN, tanba haree ba setor ekonomia no infraestrutura iha rai laran seidauk adekuadu atu kompete ho nasaun membru sira.

Diretor Ezekutivu Forum ONG Timor Leste (FONGTIL), Valentin da Costa Pinto hateten, iha tinan hirak liu ba bainhira governu hahu halo aplikasaun ofisial atu sai membru ASEAN iha tinan 2011, rekomenda ona ba governu atu adia lai, tanba haree ba situasaun rai laran neebe mak seidauk preparadu.

“Sosiedade Sivil sira iha momentu neeba ami husu ona ba ita nia governu katak, ita presiza haforsa ita nia prosesu internu, oinsa mak ita bele hakbiit diak liu tan ita nia setor privadu sira, ita nia infraestrutura, no asegura ita nia setor edukasaun neebe mak diak, kapasitasaun rekursu umanu,” dehan Valentin da Costa Pinto ba jornalista sira iha nia knaar fatin, Kuarta (21/06/2023).

Nia hatutan, TL presiza prepara aan diak liu tan, tanba banhira sai membru permanente ASEAN nee sei mosu kompetisaun oin-oin.
Tanba nee Diretor FONGTIL husu ba governu atu labele ansi no hadia lai instituisaun sira, nunee bainhira adere ba ASEAN TL tenki hamriik metin, firmi hanesan nasaun ida no labele sai fali subordinadu ba ema.

“Ami respeitu investimentu estratejiku sira husi estadu, karik ita nia perspetiva politika deit, maibe hau hanoin ita presiza hakbiit, no melhora ita nia setor ekonomia, justisa, ita nia setor sosiais, dezenvolvimentu ekonomia nee tenki forti para ita adere ba ASEAN, nee ita labele sai fali subordinadu no afeita ba ita nia movimentasaun,” dehan nia.

(alb)

LEAVE A REPLY

Please enter your comment!
Please enter your name here