Tokon US$1 Resin Halo Terminal Ba Pasajeirus

Prezidente APORTIL, Flavio Cardoso Neves. (Foto: STL/Jacinta Sequeira)

DILI, STLNEWS.co – Prezidente APORTIL, Flavio Cardoso Neves hatete, tinan nee governu prepara orsamentu tokon US$1 resin, hodi halo terminal ba pasajeirus sira iha portu Dili.

Nia dehan, terminal pasajeirus iha Oecusse diak ona, maibe nafatin halo koordenasaun neebe mak diak ho parte RAEOA, oinsa bele maneza no uza fasilidade ho diak, tanba sira husi Oecusse atu mai Dili hein iha fatin neebe diak.

“Prosesu nee lao hela osan nee iha fundu infranstrutura, tanba nee sei organiza iha ADN, tanba nee iha ADN nian okos, presiza koordena malu ho sira, tanba bainhira orsamentu nee tama iha fundu infranstrutura, prosesu hotu-hotu tenke liu husi neeba, agora prepara tekniku ami prepara hotu ona, ami nee prepara hotu ona dezain, ami tenke servisu hamutuk ho sira atu bele haree ida nee. Maibe iha portu Dili rasik iha portu, APORTIL prepara ona orsamentu, tanba ita hatene katak, terminal iha Dili nee ita nia parseiru mak halo ba ita, liu-liu kais neebe mak agora ro nakroma atraka ba nee,” dehan Flavio ba STL, iha nian knar fatin Portu Dili Segunda (08/02/2021).

Nia dehan, iha Dili nee parseiru mak Japaun, JICA mak fo finansamentu ba projetu ida nee, governu halo parseiru trilateral, ida mak governu halo parseiru ho JICA, agora parseiru Alemania ajuda TL seis milhões ate seti milhões euro, nee ba halo nakroma 2.

“Governu nian responsabel halo nusa mak prepara terminal pasajeirus neebe mak diak, atu bele garante katak, ema atu sae ro mos kondisaun terminal neebe mak diak, no tinan 2021 nee, ida nee sai prioridade APORTIL nian mos tau iha neeba, husi PN mos aseita no suporta tebes, terminal nee bele halo, tanba nee terminal nee bele halo aprova orsamentu 2021, bele tau mos prioridade ba asuntu ida nee,” nia dehan.

Prezidente APORTIL, Flavio, salienta, presiza kria kondisaun terminal ba pasajeirus sira ho diak, para pasajeirus sira bele hein ro iha fatin neebe mak diak, tanba terminal ba pasajeirus sira iha RAEOA diak ona, maibe iha portu Dili nee tenke kria fatin neebe mak diak ba pasajeirus sira, liu-liu iha tempu udan, laiha fatin ba pasajeirus sira.*

Reportajen: Jacinta Sequeira/Madalena Horta
Editora: Carme Ximenes

LEAVE A REPLY

Please enter your comment!
Please enter your name here