Trabalhador 20 Aranka Ba Australia

Aban Kuarta Feira trabalhador Timoroan nain 20, neebe antes nee servisu ona iha Australia kontinua aranka fali ba Australia, hodi kontinua sira nia servisu. (Foto: STL/Donaciano Magalhães)

DILI, STLNEWS.co – Aban Kuarta Feira trabalhador Timoroan nain 20, neebe antes nee servisu ona iha Australia kontinua aranka fali ba Australia, hodi kontinua sira nia servisu.

“Ohin hasoru malu ho kontinuasaun maluk Timoroan sira neebe servisu iha Australia, sira nain 20 aban atu aranka ba servisu kontinuasaun, tanba sira nee uluk ba tiha fila mai ferias maibe seidauk ba too agora, agora mak kompania foin bolu fali sira,” tenik SEFOPE Alarico do Rosario ba jornalista sira, iha Salaun SEFOPE, Caicoli Dili, Tersa (23/02/2021).

SEFOPE, Alarico do Rosario. (Foto: STL/Donaciano Magalhães)

Governante nee afirma lolos sira ba nee atus ida resin maibe tuir regras tenke haruka nain 20 mak sei ba, tanba ho situasaun ida agora hotu-hotu hatene tanba moras ida covid nia regras nee barak liu, neebe tenke lao kumpri tuir regras neebe mak governu Australia hasai no Timor Leste mos tenke kumpri ema nia regras.

Alarico hatete, trabalhador tuan entaun trata aviaun mai nee mos kompania mak trata mai i lori sira ba mos kompania mak responsabiliza sira. Bainhira sae tiha aviaun mak ba ema hatun iha neeba nee governu mak sala ka imi mak sala, ezemplu koalia konaba dokumentus buat ruma mate, governu hanesan fasilita alin sira ba servisu iha Australia, agora koalia konaba imi nia moras, dokumentus nee imi nain rasik, ida nee mak hotu-hotu tenke komprende, tanba governu liu husi SEFOPE fasilita alin sira ba servisu iha Australia maibe too iha trata buat neebe individu trata dokumentus ba ita nia an, so nain mak bele trata.*

Reportajen: Maria Tavares
Editora: Carme Ximenes

LEAVE A REPLY

Please enter your comment!
Please enter your name here