Trabalhador 34 Sei Dezloka Tan Ba Korea

DILI, STLNEWS.co – Trabalhador nain 34 asina tan akordu ho Sekretaria Estadu Polítika Formasaun Profisionál no Empregu (SEPFOPE), hodi dezloka ba servisu iha Korea do Sul.

Ba jornalista sira, Diretor Jeral Interinu SEPFOPE, Jacinto Barros hatete, antes haruka trabalhador ba servisu iha rai liur, tenki halo kompromisu ida husi trabalhador sira ho inan aman no governu.

“Tanba ho objetivu atu hatete ba maluk sira katak, ita nia oan ba karik iha responsabilidade mutual entre goveru, familia nomos trabalhador rasik,” tenik nia ba jornalista sira iha Timor Logde, Dili, Sesta nee (24/03/2023).

Nia dehan, trabalhador balu ba servisu tiha la kumpri fali ema nia regras ba sai fali ilegal, tanba sira ba mos laos ho naran pesoal, maibe ba ho governu nia naran no povu Timor Leste nia naran, tanba nee mak husu atu sira kumpri nafatin regras nomos prosedimentu servisu neebe iha ema nia rai.

Trabalhador 34 nee sei dezloka iha loron 26 fulan nee, no sira sei ba servisu iha area peskas nomos fabrika.

Entretantu, trabalhador Basilio de Araujo Amaral sente orgullu, tanba hetan oportunidade dala 2 hodi ba servisu iha Korea.

“Hau senti servisu iha Korea nee iha kmaan no todan mos iha hotu, buat neebe ita hakarak aproveita, ita tenki esforsu ita nia aan nudar trabalhador,” tenik nia.

Nia hatete, nudar joven oportunidade nee diak ba hotu-hotu, tanba nee tenki kumpri no halo tuir regras neebe Governu Timor Leste ho Korea haruka.

(mar)

LEAVE A REPLY

Please enter your comment!
Please enter your name here