Trabalhador Timor Oan Bele Lori Feen-Laen Sai Sidadaun Australia

DILI, STLNEWS.co – Sekretariu Estadu Formasaun Profisional no Empregu (SEFOPE), Rogerio Araújo Mendonça hatete, trabalhador Timor oan neebe servisu tinan 6 liu bele lori feen, laen no oan sai sidadaun Australia.

Tuir SEFOPE, Rogerio Araújo Mendonça katak, Governu Timor Leste servisu hamutuk ho Governu Australia atu fasilita trabalhador Timor oan neebe servisu iha Australia durante tinan 6 liu bele lori feen, laen no oan sai sidadaun Australia.

Nia dehan, programa pilotu akompanhamentu familiar nee importante tebes, tanba nee governu dezamina informasaun ba familia trabalhador sira neebe servisu tinan barak iha Australia.

“Timor oan neebe servisu tinan 6 too 9, sira tama ona ba programa PALM ka semi skill bele lori familia ba Australia,” hatete nia ba jornalista sira iha salaun Exelsior Resort Pantai Kelapa, Tersa nee (12/12/2023).

Tanba nee, governu dezamina informasaun ba familia sira, programa nee diak tebes, tanba sira ba servisu bele lori sira nia feen, laen no oan hodi akompanha sira nia servisu iha Australia.

Nia informa, trabalhador neebe partisipa iha nee, kompostu husi foun no tuan, entaun nee depende kompanhia sira hili, haree kapasidade neebe perfil iha sistema laran.

Nunee mos Diretór Nasional Empregu no Estranjeiru, Joao Pereira hatete, familia trabalhador neebe partisipa iha dezamina informasaun nee hamutuk 421, sei fahe ba sesaun tolu, dadersan, lokraik no aban.

Tanba nee familia trabalhador sira aproveita didiak oportunidade ida nee. Tanba programa pilotu akompanhamentu familiar nee importante tebes.

Iha fatin hanesan, Primeira Sekretaria Dezenvolvimentu Laboral Embaixador Australia iha Timor Leste, Penny Roberts hatete, agaradese ba Governu Timor Leste liu husi SEFOPE neebe organiza familia trabalhador sira partisipa iha programa pilotu akompanhamentu familiar, ida nee foin primeira vez.

“Governu Australia kontenti tebes bele apoiu projetu ida nee, atu hatan ba dezafiu ruma husi familia sira liu-liu trabalhador sira enfrenta,” katak nia.

Nia hatete, projetu pilotu akompanhamentu familiar foo benefisiu ba emprezariu sira no komunidade sira. Tanba projetu ida nee iha dezvantajen no vantajen, maibe nafatin enkoraja familia sira entende didiak ba programa ida nee.

Tanba Governu Australia komprometidu atu permite trabalhadores ekema PALM longu prazu hamutuk nain 200, ho oportunidade lori sira nia familia tama Australia, sé karik empregador sira konkorda.

Aplikante sei loke iha fulan Janeiru 2024, familia 100 Kiribati no Timor Leste sei hetan selesaun atu tama ba Australia.

Prosesu segundu ba selesaun restu familia sira seluk sei halao iha fulan sira ikus tinan 2024 nian.

(EST 1)

LEAVE A REPLY

Please enter your comment!
Please enter your name here