Traballador 465 Ezije SEFOPE Deside Data

Kandidatu traballadór hamutuk 465 ezíje ba Sekretária Estadu Formasaun Profesional no Empregu (SEFOPE), Alarico do Rosario atu deside data serteza ba sira, hodi hetan oportunidade ba servisu iha Korea do Sul. (Foto: STL/Claudios de Jesus)

DILI, STLNEWS.co – Kandidatu traballadór hamutuk 465 ezíje ba Sekretária Estadu Formasaun Profesional no Empregu (SEFOPE), Alarico do Rosario atu deside data serteza ba sira, hodi hetan oportunidade ba servisu iha Korea do Sul.

Reprezentante Kandidatu traballadór ba Korea do Sul, José dos Santos hatete, sira hamutuk ema nain 465 mak nia dokumentus kompletu ona, maibe too agora sidauk iha informasaun husi parte SEFOPE kona ba bainhira ba servisu iha Korea do Sul.

“Ami nia dokumentus sira hanesan viza ho osan sira nee kompletu hotu ona, no hein de’it atu ba, maibé too agora ami nunka rona data loloos atu ba nee, mak bainhira. Tanba nee maka ohin ami mai hasoru sira hodi husu ba sira atu fó data fiksu ba ami”, hatete José, iha Caicoli, Kinta (03/12/2020).

Entre sira nain 465 nee Jose dehan, sira nain 37 mak kompleta ona prosesu administrativu neebe kada ema hatama dois mill dollares (US$ 2.000) hodi hein desizaun husi SEFOPE, kona ba bainhira mak sei halo viajen ba Korea, hodi ba servisu.

“Ami 37 pesoas maka hatama ona osan ho montante dois mill dollares (US$ 2.000). Atu selu ba Aviaun. Maibe, visa sai hotu ona, so ke too agora mak seidauk aranka ba Korea”, dehan nia.

Kandidatu traballador sira nee mos kestiona kona-ba aviaun neebe atu tula sira ba Korea, sira rasik mak aluga fali.*

Reportajen: Claudios de Jesus
Editora: Carme Ximenes

LEAVE A REPLY

Please enter your comment!
Please enter your name here