Transformasaun CEFTEC Ba Institutu Formasaun Jornalista Seidauk Realiza

Diretor CEFTEC Luis Evaristo Soares. (Foto: STL/Blandina Mauno)

DILI, STLNEWS.co -Transformasaun Sentru Formasaun Teknika iha Komunikasaun (CEFTEC, sigla portuges) ba Institutu Formasaun Jornalista seidauk bele realiza iha tinan 2020 tanba limitasaun orsamentu, maske hetan ona atribuisaun kompetensia husi MAPKOMS nuudar embriaun iha tinan liu ba.

Diretor CEFTEC Luis Evaristo Soares hatete, konseitu baziku konaba estabelesimentu institutu nee eleboradu ona, maibe presiza kompleta parte balun iha area rekursu neebe iha posibilidade bele akomoda iha tinan 2021.

“Iha tinan ida nee lao ho orsamentu 2020, kondisaun sira neebe ita prepara ba transformasaun CEFTEC nuudar Institutu Formasaun Jornalista nee seidauk iha atinjimentu ida neebe mak hatudu sinal boot konaba preparasaun sira nee. Ninia konseitu baziku konaba institutu nian, ita iha ona no aprenzenta ona, maibe atu transforma konseitu nee ba dokumentus neebe mak hatudu konaba estabelesimentu Institutu Formasaun ba jornalista nee, rekursu neebe mak ita presiza sei akomoda hotu iha tinan 2021,” dehan Diretor CEFTEC Luis Evaristo ba jornalista sira iha SEKOMS Palasiu Governu Kinta (01/01/2020).

Relasiona ho infraestrutura ba estabelesimentu Institutu Formasaun Jornalista nee, Luis Evaristo haktuir planu nee sei realiza iha tinan 2022 iha neebe sei utiliza atual edifisiu Konsellu Imprensa tanba hetan atribuisaun legal husi Terras no Propriedades ba SEKOMS.

Sekretariu Estadu ba Komunikasaun Sosial Mericio Juvinal dos Reis “Akara”. (Foto: STL/Blandina Mauno)

Entretantu, Sekretariu Estadu ba Komunikasaun Sosial Mericio Juvinal dos Reis “Akara” afirma, atu sai institutu profisional ida tenki prepara kondisaun sira hanesan regra, kurikulum konteudu ba formasaun no nesesidades sira seluk.

Lider maximu SEKOMS nee realsa kriasaun institutu profisional nee atu fasilita formasaun iha rai laran no reduz dependensia iha rai liur atu evita gastu neebe nesesariu, nunee orsamentu neebe aloka bele sirkula deit iha rai laran.*

Reportajen: Blandina Mauno

Editor: Ekipa STL

LEAVE A REPLY

Please enter your comment!
Please enter your name here