DILI, STLNEWS.co – Ho implementasaun serka sanitariu no konfinamentu obrigatoriu, bandu transporte publiku labele halo movimentu no paradu total. Situasaun nee defikulta tebes komunidade sira neebe halo nia atividades negosiu.
“Tama ona fulan tolu ita nian transporte publiku paradu, hau hanoin ida nee defikulta tebes ami povu kiik neebe durante nee moris ho atividades negosiu, tanba ami ba sosa modo iha merkadu Taibessi no Tasi Tolu, ami tenke aluga deit angguna $3,atu nunee bele tula ami nian modo neebe mak ami sosa, tanba uluk seidauk SS nee, ami ba sosa modo sae bemo, maibe agora nee hakarak ka lakohi tenke husu angguna, para bele tula ami nian modo,” dehan Martinha Marques hanesan negosiante ba STL iha Bairo-Pite, Dili, Domingo (23/05/2021).
Nia dehan, durante nee nia sempre husu deit angguna, hodi ba sosa modo, maibe rendimentu la hanesan uluk, karik transporte publiku nee halai karik, nee diak para sira sae deit bemo, agora angguna nee ba mai uza ida nee tenke selu $3.
Nunee mos, Carmelita de Sousa, hanesan negosiante afirma, uluk faan hotu modo, maibe tanba ho Covid-19 ida nee, nian atividades negosiu mos sei paradu, durante nee ba sosa modo iha merkadu, depois mai faan iha uma oin, agora paradu tanba ho situasaun Covid-19.*
Reportajen: Jacinta Sequeira
Editora: Domingas Gomes
