Transporte Publiku Laiha, Pasajeirus Forma Iha Dalan

DILI, STLNEWS.co – Problema kombustivel iha rai laran halo transporte publiku labele halo movimentu, tanba mina laiha.

Tuir observasaun STL iha Sidade Dili hatudu katak, transporte publiku halai ida rua deit, no pasajeirus sira forma naruk iha estrada ninin hodi hein transporte publiku, maibe mai nakonu, tanba nee pasajeirus balun ho lao deit.

Aleinde nee transporte publiku halai mak 010, 01 no 02, nomos 09, inklui 13. Ida nee mak halao movimentu maibe sira seluk labele halao muvimentu tanba kombustivel iha Kapital Dili mamuk.

Estudante balun lao deit hodi ba eskola, tanba mikrolet halai ida rua deit, no pasajeirus mos barak tebes hodi forma iha dalan ninin, maibe transporte publiku susar atu halo movimentu, tanba nee fo impaktu ba estudante sira nomos servisu nain sira labele halao atividade hanesan baibain.

Iha fatin hanesan, Estudante UNPAZ, Francelina do Carmo esplika, transporte publiku ida rua deit mak halao movimentu, tanba kombustivel iha pertamina mamuk, kombustivel seidauk tama.

“Transporte publiku laiha, nee susar ba ami estudante atu halao aprendizajen, tristi tebes tanba fo impaktu ba ami nian eskola,” nia esplika.

Nia informa, pasajeirus barak tebes mak forma naruk iha dalan ninin, maibe transporte publiku laiha, tanba kombustivel seidauk tama.

Nia husu ba governu atu rezolve, tanba governu ida nee sei iha kompetensia atu koalia, atu nunee estudante no povu kiik sira labele sai vitima.

Nunee mos trabalhador iha Loja Belun, Carlina Moniz dehan, ohin dader tuku 07:00 hein mikrolet maibe laiha, tanba nee too agora seidauk ba servisu, senti trsti tanba labele halao atividade hanesan baibain.

“Mikrolet araska loos, tanba ida mai nakonu ho pasajeirus, mikrolet kuaze barak maka la halo movimentu tanba mina laiha,” nia informa.

Nia husu ba governu ida agora nee buka solusaun oinsa, atu nunee responde lalais ho situasan neebe povu kiik sira hasoru kuaze semana ida ho balun ona.

(jen)

LEAVE A REPLY

Please enter your comment!
Please enter your name here