DILI, STLNEWS.co – Turista sira husi rai liur barak mak sei mai iha Timor Leste, inklui jornalista Internasional sira hodi akompanha Eklipsi Solar, neebe iha tempu badak sei akontese iha Timor Leste.
Diretor Jeral Ministeriu Turizmu Komersiu Industria (MTCI), Jelino Soares hatoo asuntu nee ba jornalista sira iha Ministeriu Finansas Aitarak Laran, Dili, Sesta nee (17/03/2023).
Nia dehan, konaba Eklipsi Solar nian hatene katak, sira forma ona ekipa, ekipa nee involve husi linna ministeriais sira, setor privadu, ajensia, operador turistika sira. Nomos iha parte Hotel nian, sira nee kordena hamutuk ona, nomos lista ou estrutura ba iha Solar Eklipsi nee rasik, hetan ona aprovasaun husi Ministru Turizmu Komersiu Industria (MTCI), neebe sei involve mos husi linha ministeriais sira nia reprezentante, hodi oinsa atu bele haree servisu konjuntu hodi responde ba iha eventu ida Eklipsi Solar nee.
Nia hatete, konaba vijitantes sira, bainbain hanesan iha sira nia enkontru neebe halao ona, hamutuk ho ajensia sira, nomos husi parte Hotel, katak turista sira boking direitamente ba ajensia sira nomos ba Hotel sira.
Tanba tuir informasaun neebe sira hetan ona, hanesan parte husi Com nian, no husi Munisipiu Baukau nian mos, turista sira Boking ona. Tan nee mak sira sempre update, nomos informasaun neebe mak sira hetan husi operadora turistika sira katak, husi sientista ou astronotu sira lubuk ida mak komesa halo ona kontaktu hodi mai partisipa iha eventu nee.
“Astronotu ho Sientista balun husi Estadu Unidos Amerika, balu husi Rusia, nee mos sei mai partisipa, informasaun neebe ami hetan husi ajensia sira dehan, jornalista internasional sira husi Fransa, Italia, Estadus Unidos Amerika, mos sei mai partisipa iha eventu refere,” dehan nia.
Tanba nee, haree ba situasaun nee mosu iha tempu badak, i konaba alojamentu, sira sei kontaktu, tanba nee mak iha ekipa konjunta nee involve mos husi parte asosiasaun Hotel nian, nomos ajensia asosiasaun husi operadores turistika sira, karik turista sira mai balun mos ho kemping, tanba hatene kondisaun real neebe mak iha.
“Nunee ita identifika iha tempu badak, tekniku sira sei tun ba haree direitamente fatin, tanba fatin neebe ami halo koordenasaun mak iha Com ho Beasu nian. Tanba nee, tekniku sira tun ba hodi survei fatin ida neebe mak ita sei prepara ba iha vijitantes sira,” dehan nia.
Aleinde nee, sira mos seidauk hetan dadus klaru, tanba dadus klaru atu rejistu turista sira nee, sei hetan husi nia parseiru sira.
Iha biban nee, Sekretariu Estadu Protesaun Sivil, Joaquim Gusmao haktuir, konaba peritus ka ilmuaan nee, sientista barak mak sei mai iha Timor Leste hodi akompanha.
“Hau senti katak peritus sira ka ilmuan sira nee, sientista sira barak mak sei mai, ita hatene katak kondisaun ita nian iha Beasu neeba ladun preparasaun, talvez iha ministeriu seluk ka ministeriu neebe mak preparadu ba ida nee, Protesaun Sivil prontu fo apoiu, porezemplu se halo tenda, presiza bee, ita bele fo apoiu,” hakotu nia.
(efi)
