DILI, STLNEWS.co – Timor Leste (TL) potensial tebes ba fatin turizmu, maibe durante tinan barak nia laran governu laiha kbiit atu dezenvolve ho diak, tan nee governu ida nee tenki tau importansia ba potensialidade sira nee.
“TL potensial tebes ba fatin turizmu, maibe laiha fasildade, infraestrutura, neebe konektividade atu atrai vizitante sira, fatin balun estrada ladiak, fatin deskansa laiha, no restorante atu fasilita ema han laiha, tan nee susar tebes ba ema atu vizita, maski haree pasajen husi fatin sira nee furak tebes, maibe fasilidade laiha mak susar atrai ema,” dehan Deputada Olinda Guteres ba STL liu husi telefone, Sabadu nee (15/07/2023)
Nia afirma, setor turizmu bele sai alternativa hodi kontribui reseitas ba estadu bainhira governu investe no dezenvolve ho diak, maibe durante nee governu ladun fo atensaun, fiar katak governu ida nee bele fo atensaun makaas.
(mad)
