DILI, STLNEWS.co – Ukun fuan sanulu husi Maromak nia nee hanesan regra ida ou lei neebe hatur ona, nunee ema bele lao tuir ba dalan neebe mak los hodi moris tuir dalan diak.
Lia hirak nee hatoo husi Padre Richardo Pasang, SVD liu husi nia refleksaun diaria ba STL via telefone Sesta (28/07/2023) hatete, ukun fuan sanulu hanorin ema atu labele oho ema labele naok no seluk tan.
“Livru Exodu esplika kona ba Maromak nia ukunfuan sanulu neebe haraik ba Israel oan sira. Maromak nia mandamento katak regras ou lei neebe Maromak hatun nuudar modo de vida’ (pedoman moris) ema fiar nain sira atu bele sai ema diak. Iha ordem espeita ba hasantu ba iha mos proibisaun (larangan) keta oho keta halo adulterio keta nauk keta foti lia bosok keta kaan ema nia uma keta kaan ema nia kaben eh ema atan mane eh feto no seluk tan, “ dehan Padre.
Padre dehan buat hirak nee klaru tebes no ema hotu bele komprende. Realidade moris ema nian, dala barak ema sempre bosok Maromak.
Padre haktuir tan katak Iha proivisaun katak keta halo adulterio maibe ema utiliza nia kakutak hodi halo rasionalizasaun ho rasaun hodi halo buat nee tan lialos. manipula rasaun hodi defende nia-an.
“Liu husi Evangelho ohin loron, Maromak hakarak fo hanoin mai ita katak Maromak lakohi ita bosok bebeik Maromak ho lei sira. Maromak nia hakarak mak fiel no obedese ba Ninia ukun fuan sira. Evangelista Mateus loron ohin fo hanoin ita kona ba tipu rai sira neebe Maromak kari fini diak iha toos. Fini hot-hotu diak tebes maibe moris ka la moris depende ba ita nia fuan. Fini diak Maromak nian kari ona iha ita nia fuan, oinsa ita nia fuan bele ka lae sai rai diak atu fini nee bele moris buras no fo fuan? Ou ita hakarak, ita nia fuan sai rai neebe rona iha dalan ninin neebe ema aat mai fokit tiha? Ou ita nia fuan sai fatuk laran maibe abut la iha? Ou ita nia fuan sai rai iha aitarak laran neebe rikusoi mundu nian hanehan no la fo fuan?,” katak nia.
Padre hatutan Aiknanoik nee atu esplika klaru mai oinsa kualidade moris nuudar ema kristaun katolika neebe dehan katak fiar Maromak lolos.
“Oinsa ita nia abut fiar, abut karater catolico iha moris lor-loron ho doutrina Maromak nian. Keta baku hirus matan hau katolika maibe ita nia moris lao dook husi abut fiar no abut karater catolico. Keta bosok Maromak ho ita nia liafuan sira Keta sai traidor ba ita nia Maromak neebe kria no hadomi ita,” katak nia.
“Orasaun Nai Jesus Kristu, haraik kbiit mai ami atu bele apriende sai rai diak atu fini diak neebe kuda ona iha ami-an bele moris buras no fuan diak iha ami nia hahalok sira,” katak nia Amin
Nunee mos evanjelho loron sesta 28/07/2023 Domingo XVI Do Tempo komum EX. 20 : 1 – 17 MAT 13 : 18 – 23 Nai Jesus Kristu nia Evangelho tuir Saun Mateus Iha tempo neeba, Jesus lia tun ba eskolante sira, dehan Nee duni imi rona didiak aiknanoik kona ba ema neebe kari fini iha toos. Fini neebe monu iha dalan ninin hanesan ema neebe rona liafuan reino nian maibe la hatene lolos. Ida neebe aat mai, no hasai buat neebe kuda tiha iha ema nia laran. Fini neebe monu iha fatuk laran mak ida neebe rona liafuan hodi simu kedas ho ksolok. Maibe tan abut la iha, nia mate lalais hetan tiha susar eh terus tanba liafuan, nia monu kedas. Fini neebe monu iha aitarak laran mak ida neebe rona liafuan maibe knaar sira no rikusoi mundu nee nian hanehan liafuan nee halo nia la fo fuan. Fini monu iha rai diak mak ida neebe rona liafuan hodi hanoin didiak; ida nee fo fuan dala atus ida, ka neen nulu, ka tolu nulu.” Lia Maksoin.
(eme)
