DILI, STLNEWS.co – Kada tinan 5 governu ida ukun halo mudansa ba nia programa, tan nee VIII Governu nia ukun tenki fo importansia liu ba pilar sosial, hanesan fahe subsidiu, sesta bazika, uma UKL no seluk tan, maibe iha governu ida agora, dala ruma sei halo diferente.
“Hau hanoin IX Governu sei halo mudansa ba setor oin-oin, hanesan estarada, bee moos, linha eletrisidade, setor turizmu nomos asuntu seluk neebe liga mos ba povu nia moris,” lia hirak nee fo sai husi Emprezariu Timor oan, Mateus da Costa ba STL Domingu nee (23/07/2023) liu husi mensajen.
Nia afirma, esperansa governu ida agora bele fo importansia ba setor infraestrutura, agrikultura no turismu, tanba setor hirak nee liga tebes ba povu nia moris. Maibe setor sira nee atu lao diak no estavel mak, nee fila fali ba governasaun ida neebe ukun, nia mai ho nia planu no programa neebe diak, mak implementasaun iha baze mos bele lao diak, tanba nee ezijensia setor privadu nian mak fo importansia ba setor neebe liga ba povu nia moris, liu-liu infraestrutura bazika sira.
Iha parte seluk, reprezentanze povu iha uma fukun Parlamentu Nasional, Deputada Olinda Guteres hateten, governu bele
troka malu, maibe iha buat barak mak lao iha IX Governu nia ukun.
“Povu bele halerik ba setor infraestrutura iha fatin-fatin, maibe governu labele halo milagre iha tinan ida ka rua nia laran, dala ruma programa sira nee atu lao bazeia ba orsamentu,” dehan deputada nee.
(mad)
