DILI, STLNEWS.co – Komunidade uma kain 4.000 iha Kapital Dili, husi total uma kain 18.000 neebe oras nee daudaun rejistu ona iha sistema, kontribui ona taxa ba kofre estadu.
Kestaun nee hatoo husi Prezidente Konselhu Administrasaun Bee Timor-Leste, Empreza Publika (BTL, E.P), Carlos Peloi dos Reis, ba jornalista sira iha salaun CNE, Kuarta nee (27/07/2022).
“Iha Munisipiu Dili, ita nia uma kain hamutuk 4.000, husi total uma kain 18.000 mak rejistu ona iha sistema kontribui taxa ba kofre estadu,” nia hatete.
Nia hatete, numeru ida nee sei kiik tebes, no barak mak la kumpri dever atu selu taxa ba estadu ho rajaun oin-oin, tanba bee nudar direitu fundamentu ema nian, seidauk iha asaun neebe forti ba konsumedor sira.
Iha fatin hanesan, Diretor Ezekutivu Asosiasaun HAK, Sisto dos Santos informa, autoridade seguransa iha kompetensia tomak atu halo atuasaun ba komunidade sira neebe destroi sistema bee moos liu-liu kanu sira, tanba nee krimi.
“Komunidade balun nakar oituan, sira ba destroi kanu sira nee, ida nee tuir lo-loos kompetensia ita nia polisia tau matan, la presiza lider komunitaria sira no inan aman sira keixa, tanba bainhira polisia hatene ona nee krimi, tenki lori ba oin,” nia tenik.
(jen)
