Uma Kain 40 Iha Colmera Evakua Ba Liceu

Xefe Suku Colmera, Armenio da Silva. (Foto: STL/Natalina Lopes)

DILI, STLNEWS.co – Uma kain 40 iha suku Colmera, evakua ba Liceu, tanba sira nia hela fatin hetan estraga husi inundasaun foin lalais.

Kestaun nee hatoo husi Xefe Suku Colmera, Armenio da Silva ba STL, iha nia knaar fatin, Kuarta( 07/04/2021).

Nia dehan, dezastre nee iha fatin hotu-hotu no afeta ba ema hotu ninia vida, sasan, material lamentasaun nee ema hotu haree.

“Iha Colmera, uma kain 40 resin mak evakua ba Liceu, tanba sira nia hela fatin hetan estraga husi inundasaun,” dehan nia.

Armenio dehan, uma kain 40 resin neebe evakua ba Liceu nee too agora simu ona hahan tasak husi munisipiu Dili no estatal, maibe konaba hahan matak sira seidauk simu.

“Ami agora haloot hela dadus, iha semana ida nee ami tenke hatama ona ba iha postu no postu enkamina ba munisipiu, depois ba estatal mak ba sosial, agora prazu semana ida deit,” hakotu nia.

Iha hanesan Xefe Aldeia Manu-Fuik, Manuel Amaral dehan, komunidade iha suku Colmera aldeia Manu-Fuik, neebe afeta inundasaun no bee nakonu hamutuk uma kain 35 maka afeta no too agora sira iha hela Liceu.

Durante nee sira husi estatal no munisipiu fahe ona hahan tasak ba sira no too agora mos bee sei nakonu hela iha komunidade nia hela fatin. So bombeirus ruma mak bele supa sai tiha bee nee.

“Hau dehan katak iha buat lubuk ida mak estragus no hahan sira neebe sira hola hodi rezerva mos estragus hotu,” hakotu nia.*

Reportajen: Natalia Lopes
Editor: Ekipa STL

LEAVE A REPLY

Please enter your comment!
Please enter your name here