DILI, STLNEWS.co – Fundus Nasoins Unidas ba Populasaun (UNFPA) hamutuk ho universidade husi Tasmania asina memorandun entendimentu hodi dezenvolve intervensaun ba komportamentu atu bele redus mortalidade materna iha Timor Leste.
Asina memorandum parsería ida nee sei utiliza laboratoriu komportamental husi Tasmania nia tekniku peritu sira iha area mudansa ba hahalok no sosia, hodi produs dezenhu ba mobilizasaun sosial no komunidade. Universidade liu husi laboratoriu komportamental sei fornese mos formador peritu sira, hodi tulun programa promosaun saude husi Ministeriu Saude atu uza estratejia mudansa sosial no komprotamentu nian, hodi nunee feto sira ho idade reprodutivu bele mai iha fasilidade saude sira atu asesu ba servisus sira hanesan Planememantu Familiar.
Iha biban nee, Reprezentante UNFPA iha Timor-Leste, Pressia Arifin-Cabo liu husi nia aprezentasaun iha Hotel Timor, Sesta nee (22/09/2023) hateten, liu husi progresu diak tebes neebe halo ona atu redus mortalidade materna, iha servisu barak liu tan maka presiza atu halo hodi muda fiar sosial no kultural sira.
“UNFPA fornese ona solusaun tekniku sira atu hatun mortalidade materna iha Timor-Leste, hanesan estabelesimentu Sentru Kuidadu Emerjensia Obstetriku no Neonatal-Baziku (KEmON-B), implementasaun ba matadalan nasional ba Kuidadu Ante-Natál No Pos-Natal, no treina fornesedor saude sira iha servisus saude materna,” katak nia.
Nunee mos Diretor husi Laboratoriu Komportamental husi Tasmania, Professor Swee-Hoon Chuah, hateten ida nee onra ida atu hetan oportunidade hodi tulun servisu importante ida nee parseria ho UNFPA.
UNFPA ho Laboratoriu Komprotamental Tasmania sei estabelese kolaborasaun ba tempu naruk atu kombate mortalidade materna iha Timor-Leste liu husi mudansa sosial no komportamentu iha nível komunidade no uma-kain sira, hahu husi inan sira, enkuantu envolve mos sira nia katuas-oan, banin no familia sira tomak.
(eme)
