DILI, STLNEWS.co – Estadus Unidus liu husi Ajensia Dezenvolvimentu Internasional (USAID) parseria ho organizasaun naun governamental lokal sira, fo sai rezultadu peskiza konaba kestaun sira neebe afeta ba povu Timor Leste.
Tuir Diretora Interina Misaun USAID, Rebecca Robinson katak, Peskiza ida nee hanesan ba daruak neebe finaliza husi ONG sira, hodi apoia ba dezenvolve rekomendasaun polítika bazeia ba evidensia ba Timor oan sira neebe iha formula politika.
Peskiza nee kobre topiku oin-oin no importante neebe afeta Timor oan sira, inklui asesu ba edukasaun, saude ba ema ho defisiensia, rezolusaun disputa, komunitaria, asesu ba bee, protesaun labarik sira husi violensia seksual, asesu ba formasaun profisional joven rural, monitorizasaun komunitaria ba projetu infraestrutura, asesu ba merkadu ba produtor agrikola rural sira.
“Hau hanoin husi rezultadu estudu nee sei uza hodi hadia advokasia kolaborasaun ho governu, atu nunee bele responde ba kestaun hirak nee hodi servi diak liu tan povu Timor-Leste,” kestaun nee fo sai husi Diretora Interina Misaun USAID, Rebecca Robinson liu husi nia diskursu Kinta nee (13/04/2023) iha Timor Plaza.
Nia katak, Estadus Unidus orgulhu tebes halo parseria ho TL hodi dezenvolve sosiedade sivil ida neebe forti no vibrante, neebe sai hanesan pilar importante demokrasia nian. Liu husi peskiza ho kualidade aas hamutuk hodi fo estratajia advokasia neebe adekuadu no kolaborativu reprezenta aumentu profisionalizmu no kapasidade ONG Timor oan sira nian, no sei tulun sira neebe formula polítika atu difini politika bazeia ba informasaun neebe loos, no bazeia ba evidensia hodi haforsa rezultadu dezenvolvimentu iha Timor-Leste.
Iha fatin hanesan, Diretora JSMP Ana Paula Marcal hatutan, programa servisu hamutuk nee diak tebes, atu milhora diak liu tan servisu sosiedade sivil nian, oinsa atu haree ba aktus sira neebe realidade akontese iha rai laran.
“USAID servisu hamutuk ho ONO 3 hanesan Fongtil, JSMP no Belun hodi halo peskiza jeral ba problema sira neebe akontese iha ita nia rai laran, liga ho povu nia moris, liu husi peskiza ida nee atu fo hanoin ba governu hodi hadia diak liu tan dezenvolvimentu iha ita nia rai laran,” dehan Diretora JSMP nee.
(nat)
