DILI, STLNEWS.co – Membru Organizasaun Arte Marsiais sira bainhira utiliza atributu arte marsiais iha fatin publiku, laiha relasaun ho atividades organizasaun nian, Komisaun Reguladora Arte Marsiais (KRAM) sei aplika sansaun multa US$ 200.
Lia hirak nee hatoo husi Prezidente KRAM, Octavio da Conceisao ba STL iha Edifisiu KRAM, Lecidere, Dili, Kinta nee (24/08/2023).
Nia dehan, bazeia ba segunda diretiva KRAM nian neebe mak publika iha 2022, fahe ba treinador sira iha teritoriu Timor laran tomak, bandu para labele uza atributu arte marsiais nian hodi halo movimentasaun, so bele uza deit iha fatin treinamentu, fatin konsentrasaun ba atividades arte marsiais neebe iha kordenasaun ho Komando Polisia Nasional Timor Leste (PNTL) iha kada munisipiu nomos iha nasional sira.
“Kuandu sira utiliza laiha relasaun ho asuntu sira nee mak sansaun sei aplika ba sira hanesan hatur ona iha segunda diretiva KRAM, lei numeiru 5/2017 artigu 28 kontra ordenasaun, sira sei simu sansaun tuir lei nee,” katak nia.
Nia hatete, mekanizmu aplikasaun sansaun ba arte marsiais sira tuir lei nee iha buat 3 importante, ida mak notifika sira para atu labele kontra regras sira neebe mak lei hatete.
Nia akresenta, KRAM instituisaun neebe mak governu harii, tanba nee mak KRAM nia responsablidade kontinua konsolida sira nia organizasaun sira, no kontinua fo hanoin ba sira nia lideransa, para atu aposta ba interese estadu ida neebe aas liu. Nee mak sidadaun Timor oan hotu tenki moris hakmatek moris ho livre no labele iha ameasa husi atividades arte marsiais sira.
Iha sorin seluk, Prezidente Organizasaun Arte Marsiais husi Persaudaran Setia Hati Terate (PSHT), Baltazar Seixa Lemos mos husu ona ba membru sira atu labele utiliza atributu iha fatin publiku, enkuantu laiha atividades organizasaun nian.
“Kuandu iha atividades ruma mak ami foin halo karta ba iha KRAM no mos governu para utiliza atribuitu Arte Marsiais hodi partisipa iha atividades neebe mak iha,” dehan nia.
Nia afirma, kuandu membru sira komete aktus sira nee, husi organizasaun no KRAM sei foti medidas hodi aplika ba sira.
(mar)
