DILI, STLNEWS.co – Diretor Servisu Munisipal Jestaun Merkadu no Turizmu, Arthur Henriques hatete, vendador viatura la kumpri regras faan kareta iha Dili laran, tanba nee husu ba Polisia Nasional Timor Leste (PNTL) no Diracao Nasional de Transportes Terrestres (DNTT) tenki kontrola.
Kestaun nee hatoo husi Diretor Servisu Munisipal Jestaun Merkadu no Turizmu, Arthur Henriques ba jornalista sira iha nia knaar Autoridade Munisipiu Dili, Kinta nee (23/03/2023).
“Ita nia vendador viatura sira nee mak la kumpri regras, tanba nee ami husu ba PNTL no DNTT tenki kontrola, karik iha violasaun ruma direitamente prende, atu sira labele faan iha fatin neebe la merese faan kareta iha neeba,” nia dehan.
Nia esplika, konaba Diresaun Servisu Jestaun Munisipiu Dili nia kompetensia mak tuir Dikretu numeru Lei 33/2008, atu halao fiskalizasaun no monitorizasaun ba atividade ordenamentu teritoriu iha kapital Dili, liu-liu hijene orden publika, no kompetensia kontrolu ba viatura neebe faan kareta iha Dili laran.
Nia esplika, atu fo sansaun ba viatura sira nee kompetensia husi Polisia Nasional Timor-Leste (PNTL) nia servisu, Autoridade Munisipiu Dili halao sirkulasaun no publikasaun atu nunee sira faan ba fatin nee provizoriu.
“Ami haruka sira ba faan iha Tasi Tolu, mais saida mak akontese, sira kontinua faan iha Dili laran, sira sempre faan iha Palasiu Govenru sorin nomos iha Rotuda Nicolau Lobato nian sorin, nee mos sira faan iha neeba,” nia hatutan.
Nia deklara, Autoridade Munisipiu Dili seidauk fo fatin permante ba sira atu faan kareta, maibe sira fo fatin provizoriu atu faan sira nian kareta, iha sidade laran la autoriza atu faan kareta.
Iha fatin hanesan, Vendador Viatura Joao da Costa dehan, governu seidauk prepara fatin ba vendador viatura sira, tanba sira kontinua faan iha dalan ninin hanesan nee.
“Governu lakohi ami faan iha palasiu governu oin, entaun prepara fatin ida ba ami, atu nunee ami mos bele halao ami nia negosiu, tanba liu husi ida nee mak ami bele sustenta ami nia moris,” nia deklara.
Nia informa, sei governu seidauk iha planu neebe diak, labele muda vendador sira ba mai, tanba vendador sira mos hakarak buka osan hodi susenta familia uma laran.
Tuir observasaun neebe STL asesu iha terenu, vendador viatura sira faan kareta iha Palasiu Governu sorin no iha Rotunda Rotunda Nicolau Lobato Comoro, maibe iha balun kumpri regras husi Autoridade Munisipiu Dili hodi faan iha Tasi Tolu.
(jen)
