DILI, STLNEWS.co – Veteranus sira husu IX Governu liu husi Ministeriu Kombatente Libertasaun Nasional, atu bele buka tuir restus mortais saudozu sira nian, neebe too oras nee seidauk hetan.
Lia hirak nee hatoo husi Veteranus Pascoal Ximenes Pereira Nixon ba STL iha nia knaar fatin Bebonok, Kuarta (20/09/2023).
Nia hatete, TL hetan independensia ho sakrifisiu ema lubuk nia, tanba nee husu atu buka tuir saudozu sira neebe mak too oras nee seidauk hetan sira nia restus mortais, nunee hatuur iha fatin dignu.
Vetaranus Nixon afirma, IX Governu nia planu mak boa governasaun, signifika katak sei haree mos ema hotu neebe mak kontribui ba rai ida nee, nomos saudozu sira neebe mak oras nee seidauk hetan sira nia ruin.
“Governu agora ninia planu mak boa governasaun, se ita koalia konaba boa governasaun entau halo nusa para ema funu nain sira neebe mak mate mos ita rekoinese, sira moris mos rekonhese no mate mos ita tenke rekoinese, liu liu sira neebe mak mate iha neebe no hakoi iha neebe ita laharee,” katak Veteranus Nixon.
Nia hatutan, atu identifika heroi neebe mak mate mak presiza involvimentu veteranus neebe moris hodi buka, tanba sira mak uluk hamutuk, se la involve ho veteranus sira neebe mak hamutuk entau susar atu bele identifika.
Nunee mos Veteranus Mario De Sousa Guterres da Silva Nunura hatutan, konaba atu buka tuir restu mortais nee governu tenke hatene.
“Atu buka tuir restu mortais nee governu hatene, Primeiru Ministeriu veteranus sira mos hatene, maibe implementasaun atu lao nee mak seidauk, se seidauk implementa tanba deit finansiamentu mak laiha ou inkapasidade husi instituisaun ami nia, maibe ami sira neebe mak sei moris nee ami dezezu liu liu ami nia maluk sira nee mak mate no balun lakon tenke rekola hotu, sira nia ruin lakonsege rekoila mos ninia naran sira nee rekoila,” katak nia.
Veteranus Nunura hatete, oras nee dadaun governu liu husi Ministeriu Veteranus komesa halo dadaun ona liu husi dadus neebe mak iha, tanba nee mak rejultadu ikus mak publiku bele hatene.
“Iha parte politiku foin daudaun iha palku politiko nia hau nudar veteranus ida mos hau hatete katak lei ba veteranus mak ladiak, sentidu badak deit ezemplu hau se fulan ida hau simu kinentus dolares hau mate tiha, hau nia feen ho oan hela simu metade dozentus ciquenta, oinsa mak hela hau nia feen ho oan moris bele diak, se feto ida hakarak veteranus ida hanoin liu katak veteranus nee iha osan, maibe feto hola tiha veteranus nee mak mate inves simu nafatin quinentus dolar lae maibe hatun fali, ida nee hatudu katak ami hola feto maibe halo terus hela feto,” katak nia.
Nia hatutan, tuir nia haree lei ba veteranus mak ladiak, tanba nee mak husu governu liu husi Ministru veteranus hodi haree ba assuntu nee.
Nunee mos Ministru Asuntus Kombatentes Libertasaun Nasional (MACLN), Gil da Costa Monteiru ‘Oan Soru’ hatete, tinan oin governu sei harii jardim ba heroi sira iha Postu Administrativu 65 iha teritoriu nasional ho plaka heroi sira nia naran.
“Tinan oin ita sei harii jardim ba heroi sira iha postu 65, hodi hakerek heroi sira nia naran iha plaka jardim heroi, hahu husi sira neebe kargu boot tun too ida kiik, no kikoan sira neebe inan-aman kous no mate iha ailaran, fatuk koak, moras mak mate, mate iha mota koak, no mate hamlaha iha ailaran, no sira neebe kilat musan kona, bonbardial ho objetitu ba ukun rasik aan,” dehan Ministru Asuntus Kombatentes.
Governate nee hatutan, liu husi harii jardim ba heroi sira nee atu dignifika no valoriza sira nia luta ba ukun rasik aan, tanba luta ba ukun rasik aan nee laos prezente ida ema fo deit maibe husi sira nia luta hodi oferese sira nia vida ba ukun rasik aan.
“Liu husi harii jardim ba herois sira atu hatene postu administrativu nia ema nain hira mak mate ba ukun rasik aan, ho nunee iha loron boot ema ida-idak sei ba presta homenajen ba ita nia heroi sira,” katak nia.
(eme)
