DILI, STLNEWS.co – Vise Prezidente Parlamentu Nasional (V-PPN) Maria Angelina Lopes Sarmento hatete, relasiona ho PPN ho ekipa neebe ohin halao viajen ba Austria, programa nee preparadu iha fulan 3 ba kotuk, tanba nee labele kansela.
“Programa ida nee preparadu kedas fulan tolu ba kotuk, neebe ita komesa numeru ba Covid-19 reduidu oituan no ema komesa movimentu ba mai livre i ema barak mak vasina ona, entaun PPN fo resposta sim ba konvite ida nee,” dehan Maria Angelina ba jornalista iha PN, Sesta (03/09/2021).
Nia dehan, ema hotu la imajina katak, depois iha tempu naruk nia laran komesa livre ona, maibe iha semana rua ba kotuk Covid-19 komesa sae makaas inklui variante Delta mos komesa ataka iha rai laran. Programa atu viajen ba estranjeiru ho nivel protokolu saude ho protokolu estadu ida ke rigorozu nee la akontese semana ida, ita toba hadeer mai deside ba nee laiha.
Nia tenik, maibe nee fulan 3 antes kordenasaun ho parlamentu sira neebe organiza eventu ida nee, laos akontese iha semana ida ka rua. Tanba nee buat hotu loos ona, hakfodak rona semana rua ba kotuk Covid-19 inklui variante Delta ataka iha rai to’o transmisaun komunitaria iha ona.
“Maibe labele kansela, tanba kustu ba billete sira depois ajendamentu ba prezidente hanesan orador ja esta. Ajedamentu ba reuniaun bilaterais ja esta feito fulan 2 antes, tanba nee mak se kansela nia lori mos prezuiju ba kustu neebe mak hasai ona,” tenik nia.
Nia esplika, nia vantajen tanba saida mak sira lao, nee tanba vasina ona tenke moris normalidade ona ho Covid-19 nee. “Ita tenke habituado ona atu moris ho Covid-19, dalan atu prevene bainhira ita hetan pozitivu Covid-19, labele todan no prevene atu labele hadaet ba ema seluk nee mak tenke vasina, agora ita vasina ona ita bele lao.*
Reportajen: Domingas Soares
Editor: Ekipa STL
