DILI, STLNEWS.co – Povu husu ba Polisia Nasional Timor-Leste (PNTL) atu tau antesan ba asuntu naok teen, neebe sempre asaltu ema iha dalan no hadau ema nia sasan hodi halai.
“Ita husu ba parte seguransa atu tau atensaun ba asuntu naok teen neebe asaltu ema iha dalan no hadau ema nia sasan, tanba dala barak ita haree akontese ema hadau ita nia telefone depois halai,” hatete Vitima Julia dos Santos ba STL iha sala emerjensia HNGV, Segunda nee (24/07/2023).
Nia dehan, horiseik kalan tuku 20:00 OTL, fila servisu ema naok teen ho motor liu husi largo no ema naok teen nain rua lori motor uza ropa metan hotu hadau nia telefone husi bagasi motor.
“Ema naok teen nain 2 lori motor uza ropa metan hotu, hadau hau nia pasta no telemovel, aat liu tan mak sira hadau hotu, depos sira tebe tan hau nia motor hodi monu no rezulta hau nia liman kanek, no hau nia ain mos kanek hotu,” nia informa.
Iha fatin hanesan, Familia Vitima Anabela da Silva informa, ohin iha emerjensia mana ida mos tama uluk ho kazu neebe hanesan, agora akontese mos ba alin feto nee, ema hadau nia telefone ho pasta depois tebe tan alin monu tun ba rai, tanba nee husu ba PNTL tenki buka tuir outor sira neebe gosta naok ema nia sasan.
“Ita haree kazu hanesan nee akontese barak ona no maioria akontese ba maluk feto sira, ita haree iha Dili komesa la seguru, naok teen sira barak no buras ba beibeik, parte seguransa favor boot ida labele nonok deit, haree foti asaun neebe rigorozu ba ema naok teen sira nee,” nia deklara.
Nunee mos portavos Komando Jeral PNTL, Superientendente Polísia António da Luz dehan, too agora PNTL sei buka tuir hela autor neebe sempre hadau ema nia sasan husi motor leten, sira sempre kaer ida rua mai halo prosesu investigasaun, depois nia kazu sempre lori ba Ministeriu Publiku tuir lei neebe iha.
“Kuandu ita kaer ona no halo prosesu investigasaun, ami sempre bolu media mai hodi publika ba publiku atu hatene,” nia informa.
Nia afirma, Komando Jeral PNTL kontinua orienta Komandante Munisipiu no Servisu Informasaun Polisia no Polísia Komunitaria atu kontinua buka autor neebe sempre hadau ema nia telefone no pasta.
(jen)
