DILI, STLNEWS.co – Vitima rai halai iha Zulo Knua, Suku Zulo, Postu Administrativu Zumalai, Munisipiu Kovalima, hetan ona apoiu material rekuperasaun husi Sekretariu Estadu Protesaun Sivil (SEPS).
Kestaun nee hatoo husi Xefi Suku Zulo, Postu Administrasaun Zumalai, Munisipiu Kovalima, Joao Lopes de Carvalho ba STL liu husi telefone, Sesta nee (14/07/2023).
“Ita nia vitima uma kain 57 mak simu ona material rekuperasaun husi SEPS, mak hanesan besi baza, kalen, sementi, no kada uma kain ida hetan kalen 50, sementi saka 50, inklui besi baza 30, besi, kanoru, ember no kawat. Apoiu hirak nee mai husi ita nian Sekretariu Estadu Protesaun Sivil, no uma lisan lima mak seidauk simu apoiu material ida nee,” nia komenta.
Joao dehan, maski vitima sira simu ona ekipamentus, maibe sira seidauk halo konstruksaun uma, tanba nee sira nian preokupasaun mak husu ba ministeriu relevante, oinsa lori eksa normaliza hikas kondisaun estrada neebe kauza husi rai halai nakfila ba rai naruk, no sira tenki halo uma iha fatin seluk.
“Tuir planu ita nia vitima sira sei hetan osan, kada uma kain ida sei hetan osan US$ 1000, maibe nee fulan Agostu mak sei simu osan ida nee, tanba ita nian vitima sira husu normaliza kondisaun estrada husi area lokonpu neebe daudaun nee vitima sira hela, no vitima hirak nee sei konstrui uma iha Alu, maibe husi Lokonpo ba alu nee 200 meter, ita nian vitima sira presiza tula ekipamentus sira nee ba iha Alu,” nia dehan.
Nia afirma, too ohin loron ministeriu relevante seidauk normaliza estrada, no komunidade sira iha Zulo Knua sunu deit lilin, tanba dezde akontesimentu udan boot rai halai iha fatin refere, besi riin sira monu hotu, ho ida nee komunidade iha Zulo Knua kuaze semana rua resin ona la asesu ba eletrisidade.
Nunee mos Rafael Mendonca nudar joven iha Suku Zulo hatete, ema neebe mak ninia uma hetan estragus, sira mak sei simu material hanesan kalen, sementi, maibe vitima sira nee halo fali sira nian uma Alu, hirak neebe ninia uma estragus nee, sira hotu sei hela iha Alu.
(jac)
