Volume Ro Menus Atraka Portu

Prezidente APORTIL, Flavio Cardoso Neves. (Foto: Madalena Horta)

DILI, STLNEWS.co – Hahu iha fulan Janeiru too mai iha fulan Fevereiru tinan 2021, volume ro neebe tula sasan husi liur mai atraka portu Dili menus, kompara ho uluk.

Tuir Prezidente APORTIL, Flavio Cardoso Neves hatete, dala ruma ho situasaun pandemia covid-19, halo ro tula sasan mai portu menus, la hanesan iha situasaun neebe mak normal, maibe too agora ro sira neebe mak tama lori nesesidade baziku, liu-liu mina, fos no sasan seluk tan, tama nafatin iha portu Dili.

“Hau la hatene fos mos balun kontinua sei tama nafatin, too agora kuaze ro 10 resin. Nee durante iha fulan Janeiru nia laran, entaun ho despaisu konjuntu entre ministeriu transporte no interior, nee regulariza kontetor sira lao iha oras neebe mak labele lao. Agora sasan sira neebe mak tama iha fulan Janeiro nian laran, sasan oi-oin mak tama iha portu Dili, primeiru nesesidade baziku, mina, supermi, sabaun,aqua, no seluk tan, inklui material konstruksaun,” dehan Prezidente APORTIL Flavio ba STL iha nia knar fatin Portu, Dili, Kuarta (03/02/2021).

Prezidente APORTIL, Flavio sublina, volume ro neebe mak tama mai atraka iha portu nee menus, tanba TL mos implementa EE ida nee, rigorozu uituan, liu-liu protokolu saude nian tenke kumpri nafatin.

“Ro nebe mak mai barak iha portu nee, mai husi Surabaya Indonesia, Singapura, maibe Australia too agora seidauk, ninia frekuensia ro mai iha portu nee mak husi nasaun tolu neebe mak ohin hau temi ona nee,” dehan nia.

Iha parte seluk, Prezidente CLN, Augosto Junior Trindade, dehan, sasan importasaun sei kontinua tama nafatin iha portu Dili, liu-liu nesesidade baziku, neebe mak setor privadu balun sei nafatin importa sasan husi liur mai, tanba agora ho situasaun Covid-19, no iha faze EE nia laran, oinsa mak sasan importasaun sira nee tama mai nafatin.*

Reportajen: Jacinta Sequeira
Editor: Domigas Gomes

LEAVE A REPLY

Please enter your comment!
Please enter your name here