Xanana Ho Komunidade Hadia Estrada Maslidun

DILI, STLNEWS.co – Lider nasional Kay Rala Xanana Gusmão hamutuk ho komunidade Maslidun organiza malu hodi ateru estrada neebe hetan estragus iha kalamidade foin lalais nee.

Liu husi intrevista, Xefe Juventude Maslidun, Lorencio Menezes hateten, inundasaun neebe foin dadauk akontese lori dezastre boot ba komunidade Maslidun, uma barak hetan estragus, sasan uma laran la salva tomak, no estrada neebe atu fasilita komunidade sira ba mai nee ladiak hotu ona, tanba nee mak lider nasional tun hamutuk ho komunidade sira hodi haruka ateru.

“Durante inundasaun nee akontese, ami komunidade neebe hela iha Maslidun labele halo movimentu ba mai, ida idak iha nia fatin, tanba atu ba sosa nesesidade bazika ruma iha terminal Tasi-Tolu labele, tanba estrada ladiak, maibe liu husi Avo Nana nia apoiu neebe boot hodi mai hamutuk ho ami komunidade, nunee bele fasilita ami komunidade iha Maslidun bele lao mai ho diak, selae ami izola an deit iha fatin,” dehan Xefe Juventude nee ba STL, Domingu nee (09/05/2021) iha Maslidun.

Foto: STL/Madalena Horta

Nia afirma liu tan, liu husi lider nasional nee nia apoiu hodi hamenus tiha bee iha parte lagoa nian, nomos bee iha Maslidun mos hahu menus, no agora nia tun ho kompania sira hodi orienta suru rai ateru fila fali iha estrada neebe nakonu ho tasi ben, para komunidade sira bele halo movimentu ba mai hanesan uluk. Tuir nia katak, apoiu neebe mak Xanana halo nee valor boot tebes ba povu iha rai ida nee, tanba laiha lider seluk atu tun ba baze hodi haree povu nia terus ho susar.

Tuir observasaun STL nian iha terrenu katak, durante akontese inundasaun, Xanana tun direta iha baze hodi fo apoiu ba komunidade afetadu sira.

Aleinde nee, Xanana mos orienta kompania nasional no internasional hodi supa sai bee iha lagoa Tasi-Tolu, ohin nia kontinua tun iha Maslidun hamutuk ho komunidade sira, no orienta mos kompania nasional balun tun ho esa hodi ateru estrada iha Maslidun, tanba durante fulan ida resin akontese kalamidade, komunidade Maslidun labele lao sai ba terminal, tanba estrada neebe atu fasilita komunidade hetan estraga hotu. Xanana tun hamutuk ho komunidade sira lalin fatuk hodi ateru estrada.*

Reportajen: Guilhermina Franco/Madalena Horta
Editora: Domingas Gomes

LEAVE A REPLY

Please enter your comment!
Please enter your name here

NEWS UPDATE

Aimoruk La Too, Komunidade Buruma Balun La Vasina

BAUCAU, STLNEWS.co - Komunidade iha Suku Buruma antusiasmu tebes atu simu vasina kontra Covid-19, maibe aimoruk la sufisiente, nunee balun deit mak simu vasina...

Reativa Eskola Iha Baucau Sei Marka Audensia Ho MEJD

BAUCAU, STLNEWS.co - Diretor Servisu Munisipal Edukasaun, Juventude, no Desportu (SMEJD) Baucau, Segunda semana oin sei marka audensia ho Ministeriu Edukasaun, Juventude, no Despostu...

Komunidade Hakbesik An Ba Parte Saude Hodi Simu Vasina

DILI, STLNEWS.co - Komunidade aldeia hat iha Suku Zulo, Postu Administrativu Zumalai, Munisipiu Covalima hakbesik an ona ba saude hodi simu vasina doze primeiru...
%d bloggers like this: