Xefe Casa Civil Nia Inan Hakotu Iis ho Tinan 107

DILI, STLNEWS.co – Ana Maria Fernandes de Vasconcelos (Tinan 107), Xefe Casa Civil Prezidente, Francisco Maria de Vasconcelos nia inan hakotu ona nia iis iha Hospital Nasional Guido Valadares (HNGV) Dili, Kuarta kalan (01/09/2021) tuku 23.50 OTL.  

Xefe Casa Civil, Francisco Maria de Vasconcelos neebe agora dadaun sei iha Illa Lirung, Distritu Talaud, Sulawesi Norte – Indonesia, asiste prosesu funeral nia feen kaben, Eugenie Augusta Tatuluse, Sabadu (28/8/2021), fila hikas mai Timor iha Kinta (2/9/2021), tanba nia inan fila hikas ona ba Aman Maromak nia kadunan lalehan.   

Ho avo Ana Maria Fernandes de Vasconcelos nia mate, familia boot Xefe Casa Civil lutu dala ida tan, depois Xefe Casa Civil nia feen kaben fila hikas ba Aman Maromak nia kadunan lalehan iha loron 25 fulan Agostu tinan 2021.  

Primeiru Ministru (PM) Taur Matan Ruak neebe agora dadaun halao hela auto izolamentu iha nia rezidensia Farol, tanba pozitivu Covid-19, sente triste ho situasaun tristeza neebe hafalun familia boot Xefe Casa Civil, Francisco Maria de Vasconcelos.

Ho matan wen sulin, PM Taur liu husi video call husi nia rezidensia Farol mai mate uma hodi haree ho matan mate isin matebian Ana Maria Fernandes de Vasconcelos.  

Tuir informasaun neebe diariu nee rekolla iha mate uma, Fatumeta, Aldeia 5 Outubru, Suku Bairo Pite, Postu Administrativu Dom Aleixo, Munisipiu Dili, antes hakotu iis, matebian konsege lori ba HNGV Dili atu hetan tratamentu saude insentivu husi mediku sira. Maibe, ho Maromak nia planu, iha Kuarta kalan, matebian fila hikas ba Aman Maromak nia kadunan lalehan.

Matebian nia oan sira dehan katak, sira nia inan mate tanba idade avansadu ona (tinan 107), nomos nia triste ho nia feto foun neebe mate uluk ona. “Aleinde idade, nia mos sempre tanis hodi hanoin nia feto foun neebe mate uluk ona. Ami sempre haree ama tanis hela deit to’o nia hakotu iis,” dehan matebian nia oan sira.

Situasaun tristeza akontese iha mate uma bainhira mate isin hatama iha kaisaun laran. Informasaun konaba avo Ana Maria Fernandes de Vasconcelos nia mate nakonu iha media sosial, liu – liu iha wall Facebook.

Sentimentu tristeza no kondolensia profunda hato’o husi familia em-lutada, parentes no amigus neebe nakonu iha wall Facebook. Tuir mai sentimentu tristeza no kondolensia profunda neebe hato’o husi ema barak liu husi Facebook.

“RIP hau nia doben nain 2. Selamat jalan Dua orang yang saya kasihi, mamaku Dan istriku”. (Francisco Maria de Vasconcelos).

“Hau nia mama doben, ba hamutuk hela ho Nai Jesus. Ami sente triste no lakon inan murak rai, maibe orgullu tanba mama halo servisu to’o ramata. Premiu boot mama hetan iha lalehan. Foin semana ida mama nia feto foun ba hasoru Nai Jesus, agora mama tuir tan. Maibe ami fiar katak, Nai Jesus sempre hamutuk ami, kontinua halao obra ita nia Aman Maromak nian, eransa neebe imi rua papa husik hela ba ami. Boa viajen mama Ana Maria Fernandes, ba hasoru Nai Jesus iha fatin santu”. (Merry de Vasconcelos).

“Lakon duni ona husi ami hotu nia leet avó Ana Maria Fernandes de Vasconcelos”. (Nilda Fredericka SV).

“Avó Mãe Kala laiha duni ona husi ami hotu nia leet. Ami ba uma Fatumeta kala la haree ona avó Mãe”. (Estela Guterres).

“Deskansa ho hakmatek Tia Fatumeta. Sentidu kondolensia klean ba Primu Francisco Maria de Vasconcelos, Abraão Vasconselos ho familia sira hotu”. (Estanislau Saldanha).

Turut berduka cita Ama Anna Vivaxi, Maun Adi , Nilda Fredericka SV dan seluruh keluarga besar Vasconcelos. Tuhan Yesus sumber kekuatan dan penghiburan bagi seluruh keluarga besar yang ditinggalkan. DEP Avo Ana”. (Emmy Kezia Volcan).

Ana Maria Fernandes de Vasconcelos, moris iha Uatu-Carbau, Munisipiu Viqueque iha loron 15 fulan Abril tinan 1914. Oan daruak husi bin alin nain tolu, aifuan domin, Cae-Laco no Nae-Mau. Nia la eskola formal, maibe ho esforsu rasik to’o nia bele lee. 

Nia moris husi kiik to’o joven iha nia moris fatin, Uatu-Carbau, Munisipiu Viqueque. Iha tinan 1945, bainhira nia idade tinan 31, Ana Maria mai Dili. Iha tinan 1947, nia hasoru Pastor Vicente de Vasconcelos no monu domin ba nia. Tanba domin, iha tinan 1963, Ana Maria ho Vicente deside hodi harii uma kain nazaret nian.

Husi sira nia kazamentu, rezulta oan nain lima (5) kompostu husi, Maria Filomena de Vasconcelos, Joana Maria de Vasconcelos, Fransisco Maria de Vasconcelos, Abrão de Vasconcelos no Maria da Graca de Vasconcelos.

Durante sira nia moris hanesan feen ho laen, sira eduka nia oan nain lima nee ho disiplina no badinas servisu. Hanorin oan sira atu respeitu ema hotu.

“La bele moe halo toos ka natar. La bele moe liman foer, la bele moe halo natar ka toos, maske nivel edukasaun aas,” lisan ida nee mak avo Ana hanorin ba nia oan sira. 

Avo Ana Maria nia dedikasaun durante nia moris mak, hanesan ajuda ema moras sira, liu – liu inan feton isin rua no ajuda ema moras oin – oin. Avo Ana la sura kolen ou husu buat ruma husi ema neebe nia ajuda.

Avo Ana ho nia laen kaben, Pastor Vicente de Vasconcelos mak harii Igreja Kristaun Protestante iha Timor – Timur (agora Timor Leste). Igreja Hosana Dili harii inisiu husi idea Avo Ana ho nia kaben Pastor Vicente de Vasconcelos.

Iha tinan 1988 avo Ana partisipa iha Asembleia nee organiza husi Igereja iha Indonezia (PGI) neebe realiza  iha Bali. Avo Ana reprezenta feto kristaun, Igreja Kristaun iha Timor Timur (GKTT).
Husi tinan 1992 avo Ana moris mesak ona, tanba nia laen kaben fila hikas ona ba Aman Maromak nia kadunan santu. Maske moris mesak, maibe atividade tulun ema lao nafatin.

Avo Ana neebe mate ho idade 107, fulan haat (4) loron sanulu resin hitu (17), husik hela oan nain 5, feto no mane foun nain 3, bei-oan 14 no 25 cicit. Boa viajen Avo Ana.

Reportajen: Yulius Ora/Mikael Mali Mau

Editor: Ekipa STL

LEAVE A REPLY

Please enter your comment!
Please enter your name here

NEWS UPDATE

Update Covid-19 TL 23 Setembru: Kazu Pozitivu 58, Rekuperadu 148 & Obitu 1

DILI, STLNEWS.co – Sentru Integradu Jestaun Krize (SIJK) ohin relata kazu pozitivu iha ema nain 58, i kazu rekuperadu ohin loron 148 no obitu nain...

Vasinasaun Dalan Seguru, Normaliza Situasaun

DILI, STLNEWS.co – Vasinasaun mak dalan seguru hodi normaliza situasaun, no hasae imunidade forte atu prevene Covid-19. Kestaun nee haktuir husi Ministru Ensinu Superior Siensia...

Finalista ICS 292 Simu Graduasaun

DILI, STLNEWS.co – Institutu Ciencia Saude (ICS), ohin halao graduasaun ba finalista hamutuk 292, kompostu husi fakuldade 4 mak hanesan, Fakuldade Enfarmajen, Farmasia, Parteira...
%d bloggers like this: