Xefi Suku Agradese Partidu Politiku 17

DILI, STLNEWS.co – Tuir Xefi Suku Kaikoli, Hipolito Marques Sarmento agradese ba partidu politiku 17, neebe durante nee halao ona sira nia atividade kampanha eleitoral ho diak, maski balun trata malu no hatun malu.

“Hau agradese ba partidu politiku 17, tanba atividade lao diak,” dehan Xefi Suku Kaikoli, Hipolito Marques Sarmento ba STL iha Kuarta (23/05/2023).

Nia dehan, partidu politiku 17 durante halao sira nian kampanha eleitoral, balun koalia programa diak, balun mos sei insulta malu, mais narealidade hatudu ba mundu katak, Timor-Leste buat hotu lao diak.

Nia mos husu ba joven sira, partidu neebe mak manan, politika mak hanesan nee, tanba joven sira iha Suku Kaikoli tur hakmatek hodi asiste governu dala 9, neebe atu forma lider husi lider karismatiku Kay Rala Xanana Gusmao.

Iha fatin hanesan, Xefi Suku Eurico da Costa de Jesus informa, partidu politiku 17 halao atividade lao diak, maski ohin hatudu ona ba mundu katak, CNRT manan ona, no sei lidera IX Governu, tanba ida nee povu mak hili rasik.

Nia informa, durante kampanha eleitoral iha Suku Komoro situasaun lao hakmatek, laiha problema, tanba se deit mak ba ukun mos diak hotu. Importante mak kria kampu servisu ba rai ida nee, atu nunee juventude tur hakmatek hodi servisu no susenta sira nia moris loron-loron.

Nunee mos Maria da Costa informa, esperansa ba governu foun nee tenki tau matan iha setor edukasaun, saude, infraestrutura, nunee mos kampu servisu ba juventude sira iha rai laran.

(jen)

LEAVE A REPLY

Please enter your comment!
Please enter your name here