DILI, STLNEWS.co – Tuir Xefi Suku Vila Verde, Postu Administrativu Vera Cruz, Munisipiu Dili, Abdul Mancoli Arranhado hateten, sira laiha poder legal atu akuza komunidade sira labele halo uma iha fatin neebe risku, hanesan rai lolon no mota ibun.
“Ita nudar Xefi Suku no Xefi Aldeia iha responsabilidade atu fo hanoin nafatin ba ita nia komunidade sira, maibe ami laiha poder legal atu akuza komunidade sira neebe kontinua harii uma iha foho leten, mota ninin no valeta leten sira,” Xefi Suku Villa Verde, Postu Administrativu Vera Cruz, Munisipiu Dili, Abdul Mancoli Arranhado ba STL iha Sede Suku Vila Verde, Kuarta (27/09/2023).
Nia dehan, durante nee sira kontinua halo sosializasaun no koalia beibeik ho komunidade sira labele halo uma iha area neebe risku.
“Ita akompanha ida-ida hetan rai nia halo deit uma, laiha autorizasaun, depois hetan dezastre ona mak husu ba governu, maibe ami avizu hotu ona katak labele halo uma iha rai lolon, mota ibun neebe risku, maibe kontinua nafatin,” nia tenik.
Nia esplika, numeru uma iha foho leten aumenta ba beibeik, no governu sentral haruka autoridade lokal sira atu prevene, maibe laiha baze legal ida atu fo poder ba sira halo atuasaun.
“Ami rejistu kuaze iha uma 50 resin mak harii uma iha foho leten, no numeru nee aumenta ba beibeik, maibe ita la bele halo buat ida,” nia informa.
Iha fatin seluk, Administrador Postu Administrativu Vera Cruz, Munisipiu Dili, Manuel Gusmão esplika, avizu ba komunidade halo beibeik, no komunidade barak konsiente area foho leten, mota ibun nee risku ba dezastre, maibe kondisaun ekonomia, kualker fatin neebe sira hetan harii uma.
“Hau hanoin tanba situasaun ekonomia laiha osan atu sosa rai, entaun sira halo duni iha fatin sira hanesan nee,” nia deklara.
Tuir informasaun neebe STL asesu katak, iha dekretu lei nu 33/2008 konaba ijiene no ordem publika, bandu halo uma iha area risku dezastre, maibe lei nee sei sosializa nafatin, seidauk iha asaun neebe kondena komunidade sira halo uma iha fatin risku sira, tanba nee komunidade kontinua halo uma iha foho lolon, mota ibun, tasi ibun nomos trotoar leten.
(jen)
