XG Halo Relasaun Diak Ho Komunidade Tasi Tolu

DILI, STLNEWS.co – Hafoin akontese kalamidade iha loron 4 fulan Abril liuba, lider karismatiju Kay Rala Xanana Gusmão halo ona relasaun diak ho komunidade Tasi Tolu hodi apoiu malu, supa bee iha lagoa no normaliza estrada Maslidun hodi fasilita komunidade sira.

Kestaun nee fo sai husi lider nasional Kay Rala Xanana Gusmão, bainhira lao haleu lagoa Tasi Tolu, Sabadu (05/06/2021).

“Besik fulan rua ona hau nia relasaun diak tebes ho komunidade Tasi Tolu, hahu husi labarik kiik sira too ferik katuas sira, tanba imi nia apoiu no kooperasaun diak maka ohin loron ita halo serimonia agradesementu ba normalizasaun bee iha lagoa no estrada Maslidun,” dehan Xanana.

Komunidade uma kain barak maka fila hikas ona ba sira nia uma, no povu neebe hela iha Maslidun bele asesu ona ba estrada, buat sira nee hotu tanba kooperasaun no kolaborasaun povu tomak nian.

“Hau nia agradese boot ba hotu hotu neebe fo ona apoiu voluntariumente hodi normaliza problema bee lagoa nomos estrada, tanba besik fulan rua imi servisu voluntariu la simu osan ou la simu salariu, imi apoiu sira nee hotu hatudu katak imi Timor oan, bainhira maluk sira neebe hasoru susar imi sempre iha sira nia sorin ho voluntariumente,” dehan XG.

Biban nee nia mos husu ba joven no povu tomak, bainhira halo asaun ruma ba maluk sira neebe hasoru susar, labele hanoin atu husu kolen ka rekonpensa, asaun neebe X-Team no povu Tasi Tolu halo nee, hanesan ezemplu diak no kaer metin prinsipiu iha aban bainrua karik maluk ruma presiza tulun.

Iha fatin hanesan, Domingos da Costa hanesan Xefe de Bairo afirma, hafoin halo serimonia kultura loke bee dalan, lider karismatiku Kay Rala Xanana Gusmão fo nia kontribuisaun tomak hamutuk ho kompania sira, X-Team no povu tomak koopera hamutuk hodi supa sai bee iha lagoa Tasi Tolu, tanba kalamidade neebe akontese iha loron 4 fulan Abril liuba nee lori dezastre boot ba povu Tasi Tolu.

“Ami nia kooperasaun ho avo Nana metin tebes, tanba durante nee avo la sente kolen, no laiha tempu ba nia atu deskansa oituan iha uma, avo sempre fo nia kontribuisaun tomak, dader too kalan servisu hamutuk ho ekipa hodi supa sai bee iha lagoa, no normaliza mos estrada,” dehan Xefe Bairo nee.*

Reportajen: Madalena Horta/Guilhermina Franco
Editora: Domingas Gomes

LEAVE A REPLY

Please enter your comment!
Please enter your name here

NEWS UPDATE

Reativa Eskola Iha Baucau Sei Marka Audensia Ho MEJD

BAUCAU, STLNEWS.co - Diretor Servisu Munisipal Edukasaun, Juventude, no Desportu (SMEJD) Baucau, Segunda semana oin sei marka audensia ho Ministeriu Edukasaun, Juventude, no Despostu...

Komunidade Hakbesik An Ba Parte Saude Hodi Simu Vasina

DILI, STLNEWS.co - Komunidade aldeia hat iha Suku Zulo, Postu Administrativu Zumalai, Munisipiu Covalima hakbesik an ona ba saude hodi simu vasina doze primeiru...

ETDA Rejistu Estudantes 670

DILI, STLNEWS.co - Hahu iha fulan Janeiru too fulan Fevereiru 2021, sentru formasaun East Timor Development Agency (ETDA) rejistu estudantes hamutuk 670, maibe ema...
%d bloggers like this: