Yasinta Rejeita, “Forum das Fundadores de Rede Feto” Ilegal

Konsellu Diretoria Rede Feto, neebe lidera husi Prezidente Yasinta Lujina (MOFFE Timor-Leste), rejeita total akuzasaun husi “Forum das Fundadores de Rede Feto” tanba konsidera laeziste iha estatuta no ilegal. (Foto: STL/Santina Castro)

DILI, STLNEWS.co – Konsellu Diretoria Rede Feto, neebe lidera husi Prezidente Yasinta Lujina (MOFFE Timor-Leste), rejeita total akuzasaun husi “Forum das Fundadores de Rede Feto” tanba konsidera laeziste iha estatuta no ilegal.

Liu husi konferensia imprensa, Konsellu Diretoria Rede Feto periodu 2020-2024 neebe kompostu husi membrus organizasaun Rede Feto nian hanesan:
• Prezidente: Yasinta Lujina (MOFFE Timor-Leste)
• Vice Prezidente: Teresinha Cardoso (CAUCUS, Feto iha Politika)
• Sekretaria: Paula Corte Real de Araujo (Memoria Institusaun)
• Tezoreiro: Manuel dos Santos (PRADET)
• Membru 1: Graciana da Silva (FMF)
• Membru 2: Veronica de Sousa (ACF)
• Membru 3: Ricar Pasguela (WWCTL)
• Membru 4: Eusebio Abrantes (SHC),
neebe eleitu no simu mandatu husi Asembleia Jeral Membru (AJM) Rede Feto Timor-Leste iha toron 01 Outubro 2020 durante tinan 4 (2020-2024), neebe konsagra iha estatutu Rede Feto Timor-Leste.

“Ami hakarak hatoo klarifikasaun ba publiku, relasiona ho akuzasaun husi “Forum das Fundadores de Rede Feto” neebe publiku iha media, ami hakarak deklara ba publiku katak, ami rejeita total akuzasaun neebe hatoo husi pessoal hirak hanaran “Forum das Fundadores de Rede Feto” dehan portavoz Manuel dos santos, liu husi konferensia imprensa iha salaun Rede Feto, Obrigada Barak, Caicoli, Dili, Segunda (29/03/2021).

Nia dehan, Konsellu Diretoria Rede Feto neebe hetan fiar husi AJM Rede Feto halao papel no kompetensia sira neebe preve ona iha estatutu Rede Feto sub kapitulu II artigu 27 neebe aprova ona iha AJM Rede Feto Timor-Leste iha loron 1 Outubro 2020.

No husi artigu nee, fo kompetensia no poder ba Konsellu Diretoria hodi foti desizaun apropriadu ba iregularidade neebe akontese iha Sekretariadu Rede Feto. Tamba nee, wainhira asaun hirak Konsellu Diretoria foti hodi halao fiskalizasaun no foti medida ruma ba iha asuntu hirak nee, laos abuzu de poder.

“Konsellu Diretoria nuudar reprezentante membru organizasaun Rede Feto, iha reponsabilidade atu aktualiza informasaun ba membru Rede Feto konaba situasaun neebe akontese iha Sekretariadu Rede Feto, nunee iha loron 26 de Fevereiro 2021 halao enkontru assembleia membru hodi aprezenta no aktualiza ba membrus konaba prosesu no desizaun sira neebe Konsellu halao ona.

Nia hatutan, asembleia fo nafatin konfiansa tomak ba Konsellu Diretoria hodi halao nia papel no kompetensia neebe preve iha estatuta Rede Feto hodi asegura funsionamentu Sekreteriadu Rede Feto, atu implementa projetus/programa tuir planu ho prinsipiu neebe garante boa governasaun iha institusaun ho transparinsia no akuntabilidade.

Tanba nee, Konsellu Diretoria kontinua servisu fo apoiu direita no indireita ba iha implementasaun programa hirak neebe lao dadaun iha Rede Feto, no mos asegura komunikasaun no koordenasaun diak ho parseiru no doador importante sira neebe apoiu programa Rede Feto.

Iha enkontru aseimbleia nee mos, hamosu rezolusaun ho desizaun importante sira hanesan kondena no rejeita karta husi “Forum das Fundadores de Rede Feto” ba Konsellu Rede Feto data 25 Fevereiru 2021, ho asuntu: Konjelamentu Sekreteriadu Ezekutiva no Konsellu Diretoria, tamba “Forum dos Fundadores de Rede Feto” tau sira nia an nuudar nain ba Rede Feto Timor-Leste.

Karta husi forum hetan reajen husi assembleia hodi rejeita karta refere tanba la refleta iha estatutu Rede Feto. Assembleia konsidera forum nee illegal, tamba iha estatutu Rede Feto aprovadu iha AJM fulan Outubro 2020, tanba nee laeziste no larekonese “Forum dos Fundadores de Rede Feto”.

Laeziste termu fundador nuudar “NAIN” ba Rede Feto, tamba instituisaun Rede Feto laos kompania ida, hodi fo kompetensia ba fundador halo desizaun ruma no lamensiona meius desizaun hanesan Konjela Sekretariadu Ezekutivu no Konsellu Diretoria, hanesan publikasaun iha media online ida iha 27 Marsu 2021, katak halao ona Asembleia Membru Estraordinariu Rede Feto, ida nee laiha konesementu husi Konsellu Diretoria, no ate agora mos Konsellu Diretoria seidauk simu proposta husi 23 membrus organizasaun hodi husu atu realiza Asembleia Estraordinaria atu diskute assuntus urjentes ruma tuir nesesidades ka atu solusiona asuntus importante ruma.

Enkontru refere organiza husi “Forum das Fundadores de Rede Feto” laiha lejitimidade, neebe deklara an no tau an hanesan “NAIN” ba Rede Feto. Aktu hirak “Forum dos Fundadores de Rede Feto” hatudu momos katak sira halo abuzu de konfiansa, ignora no Ia respeita Asembleia Jeral Membru Rede Feto iha Outubro 2020 neebe mak hanesan autoridade supreme, nomos viola estatutu Rede Feto aprovadu iha Asembileia Jeral Membru Rede Feto.

Konsellu Diretoria Rede Feto rejeita total desizaun, asaun no akuzasaun husi “Forum das Fundadores de Timor-Leste” hanesan publika iha media online ida, no Konsellu Diretoria ida nee sei halao nia papel tuir estatutu Rede Feto no mandatu neebe nia simu ona.

Iha fatin hanesan, Prezidente Yasinta Lujina hatutan, iha publikasaun neebe ema halo akuzasaun ba Konsellu Diretoria katak halo abuzu poder, tanba nee atu dehan katak servisu neebe sira halo bazeia ba estutu neebe fo kompetensia ba sira, tanba nee wainhira mosu preokupasoens ka iregularidade ruma neebe mak akontese, tanba nee tenki foti asaun.

“Loos, nee problema internal no organizasaun hotu hotu hasoru problema, tanba nee iha problema neebe presiza buka tuir, tanba nee mak papel husi ami konsellu hodi fiskaliza husi preokupasoens neebe mak iha, loloos buat sira akontese nee atu dehan katak asuntu administrativu, maibe la presiza atu devia atu konsidera abuzu poder,” dehan Prezidente Konsellu Diritoria.

Nia dehan, sira sente triste tebes iha situasaun hanesan nee, maibe mosu tan akuzasaun neebe lamerese atu fo, tanba servisu neebe sira halo bazeia ba preve estatuta fo kompetensia, nunee sira sai hanesan mata dalan hodi halao servisu.

“Ema hirak neebe akuza ami lapresiza mensiona, agora atu dehan katak organizasaun “Forum das Fundadores de Rede Feto” ida nee iha estatuta larekonese, no nunka temi iha organizasaun,” tenik nia.

Tanba nee bazeia ba estatuta nee laos pesoal husi konsellu mak hetete, maibe estatuta mak hatete hotu iha asembleia jeral neebe konsellu halo iha 26 Fevereiru, tanba nee membru asembleia rasik mak deside katak forum ida nee rejeita totalmente katak laeziste, tanba lapreve iha estatuta, tanba nee Konsellu Rede Feto larekonese.*

Reportajen: Santina Castro
Editor: Crisogono Magalhães

LEAVE A REPLY

Please enter your comment!
Please enter your name here