Zelia Prontu Lidera Rede Feto

Prezidente Rede Feto foun, Zelia Fernandes. (Foto: Espesial)

DILI, STLNEWS.co – Prezidente Rede Feto foun, Zelia Fernandes, neebe mak hili husi membru organizasaun no fundador sira hamutuk 33 (prense 2/3) liu husi asembleia membru estraordinariu hodi troka Prezidente Sesante Yasinta Lusina, prontu atu lidera Rede Feto tuir estatutu neebe mak iha.

“Hau nomeadu no delega husi Organizasaun Popular Mulher de Timor (OPMT) atu reprezenta OPMT iha asembleia membru extraordinaria, nomos nuudar membru iha estatutu klaru katak prontu atu eleitu no prontu atu hili, tanba nee mak membru sira bainhira hatama hau nia naran iha lista pakote, hau rasik nuudar membru neebe delega husu fundadores OPMT ba reprezenta iha Rede Feto, hau prontu para atu asume,” hatete Prezidente Rede Feto foun, Zelia Fernandes ba STL, liu husi telefone, Domingu (28/03/2021).

Prezidente Redi Feto foun nee afirma, sira prontu atu lidera organizasaun Rede Feto tanba Rede Feto hanesan mahon ba organizasaun feto sira, no organizasaun nee mos harii iha tempu defisil nia laran.

Zelia informa liutan, nia iha planu no programa lubuk ida, maibe iha mos estrutura neebe mak iha katak Konsellu Diretoria nudar Orgaun kolejial neebe halo supervizaun no asegura funsionamentu Rede Feto tuir estatutu neebe hatuur ho mandatu visaun no misaun RFTL.

Iha parte seluk fundador Rede Feto, Judite Dias Ximenes hatutan, organizasaun membru no fundador Rede Feto Timor Leste (RFTL), iha loron Sesta konvoka asembleia estraordinaria no konsege hili fali Zelia Fernandes ho nian pakote hodi troka Prezidente Sesante Yasinta Lusina no nian estrutura sira.*

Reportajen: Emerenciana Pinto
Editor: Ekipa STL

LEAVE A REPLY

Please enter your comment!
Please enter your name here