Asidente Fatu-ahi : MP Husu TDD Kondena Natalino Komarka Tinan 5

DILI – Tribunal Distrital Dili (TDD) remata ona julgamentu ba kazu asidente Fatu-ahi nebe hamate ema nain lima no nain 6 seluk hetan kanek, inklui estraga kios, sasan pasazeirus sira nian nebe tula iha mikrolet. Remata rona deklarasaun husi arguidu no vitima sira, Miinisteriu Publiku (MP) nebe reprezenta husi Prokurador Renato Berenahak liu husi alegasaun, husu ba Tribunal Distrital Dili (TDD) atu kondena arguidu Natalino Guterres ho pena prizaun tinan 5.

“Ami konsidera arguidu komete krime homesidu no ofensas korporais,  nebe mak konsege rezulta ema nain 5 mate, ema nain 6 kanek no estraga ema nia kios no mos modo pasazeirus sira nian. Tan nee ami husu atu kondena arguidu tinan 5 kadeia,” dehan Renato ba Tribunal, Segunda (06/05/2013) liu husi julgamentu iha Tribunal Distrital Dili.

Entretantu parte Defensor Publiku, Fernando Carvalho nebe fo asistensia legal ba arguidu husu ba Tribunal atu fo pena suspensaun ba arguidu, tanba tuir defensor, arguidu ho nia diretor kompania fo ona kompensasaun ba ema nebe mate no mos selu hotu sasan sira nebe estraga inkului mos fo mikrolet foun ida ba vitima nebe nia mikrolet hetan soke husi kartea kompania EDS Lda nee.

Antes julgamentu, TDD le sai akuzasaun husi MP katak, arguidu komete krime homesidu dilijente no krime ofensas publiku, tamba asidente nee hamate ema nain 5 no nain 6 kanek todan. Akuzasaun nee mos esplika, asidente trafiku halo lezada sira susar halao knar hanesan bai-bain tanba sofre husi asidente nee. Arguidu Natalino Guterres nebe hanesan kondotor ba kareta fuzu modelu Sankania ho roda 10 husi kompania EDS.Lda hodi tula makina jerador husi Metinaro mai iha Dili, maibe too iha Fatu-ahi, travaun laiha ou la han tamba mangera kareta nakfera.

“Kondisaun kareta hau check diak hela too iha kruzamentu estrada aat hali hun kondisaun kareta seidauk a’at, maibe too iha dalan aat momentu neba kompania Montana Diak mak hadia estrada nebé kareta ida fakar hela fatuk hau atu para maibe la konsege tamba mangera nakfera halo trasaun ho rem la hetan,” haktuir Natalino ba tribunal.   Natalino dehan, maske kareta  fuzu skania la hanesan ho fuzu sira seluk, tanba kareta ne’e uza mangera, entaun kondisaun kareta la hanesan kareta seluk nia kondisaun maske sai husi Metinaro kondisaun kareta diak hela.
Kazu asidente trafiku nebe akontese iha area Fathu-ahi-Becora  nee impaktu husi kareta fuzu nebe soke kareta Mikrolet no kios ida iha loron 17 Fevereiru 2010.

Kazu nee rejita ho numeru prosesu 0559/2010.PDDIL.Hafoin rona alegasaun husi parte MP no mos defeza, juis singular Jose Maria de Araujo, deside adia julgamentu nee ba loron 24 fulan Maio nee, hodi rona leitura sentensa ba kazu asidente trafiku nebe akontese iha Fatu-ahi. lay

LEAVE A REPLY

Please enter your comment!
Please enter your name here