Harii Sidade Foun Oecusse : Investimentu Estadu 1,3 Biloens, Privadu 2 Biloens Resin

DILI — Planu Governu atu harii sidade foun ho standar Internasional iha Enklave Oekusi, presija investe osanpor volta U$ 1,3 biloens  husi estadu no enkuantu previzaun investimentu seitor privadu por volta U$ 2 biloens resin. “Iha primeiru, segundu no Terceira faze maka estadu sei investe U$ 1,3 biloens, nee kalkulasuan nebee iha agora. Aban bainrua maka haree bele hamenus ou bele aumenta. No husi Privadu osan biloens 2 resin dolar amerikanu. Signifika estadu investe um tercu no privadu nia osan mak barak liu estadu nian,” hatete Eis Primeiru Ministru, Marii Alkatiri, nebe  Governu Indika  atu halo Master Plan ba Zona Espesial Oecusse, ba Jornalista hafoin hasoru malu ho Sekretariu Estadu Politika Formasaun Profesional (SEPFOPE), Ilidio Ximenes da Costa iha ninia rezidensia, Farol, Tersa (7/5). Eis Primeiru Ministru, esplika  osan estadu nian nee sei iha hela retornu, nee mak ida infra-estrutura, no  sei  loke kampu servisu inklui mos seitor privadu atu kontribui kombate pobreza iha rai laran.

Tuir Eis Primeiru Ministru  katak projeitu nee nudar programa nasional,  laos distrital ka rejional no  prosesu nee mos sei lori tempu naruk tanba volume nebe boot. “Nee mak hau hakarak dehan katak hau la halo projeitu, maibe nee nudar planu ho programa ida. Tanba ba Oecusse rasik sei tama projeitu lubuk ida iha planu no programa ida nee nian laran. Tanba hau sei la kaer projeitu sira nee, maibe seitor ida-idak mak sei kaer, no hau nian responsabilidade mak halo planu no programa,” hatete Alkatiri.

Sekretariu Jeral Partidu Fretilin nee hatutan atu implementa master plan ka ezekuta mak presija orsamentu, atu harii uma ida presija osan. Nunee mos  master plan  nee sei dezenhu nian, maibe atu harii sidade foun ou atividade ekonomiku foun ida iha Oecusse presija osan barak. “Tanba sidade foun atu harii nee ba ema rihun tolunolu ka rihun limanolu mak atu hela iha nebaa. Nebee sei harii mos eskola,hospital nomos universidade inklui aeroportu Internasional  ho nivel internasional,” deklara Eis Primeiru Ministru, Alkatiri.

Membru governu balun, katak Alkatiri, hetan orientasaun husi Primeiru Ministru, Kay Rala Xanana Gusmao, hodi mai koalia master plan nee. Tanba, projeitu Zona Espesial nebee atu halao iha Oecusse nee nudar projeitu nasional. “Sira mai nee mos atu halo koordenasuan diak liu tan ba rekursu nebee atu gasta mos tenke gasta ho didiak. No SEPFOPE Ilidio mai  nee, atu halo koordernasuan nebee diak liu ho governu, nomos ho ekipa nebee mak atu harii agora nee hodi halao programa ekonomiku ida nebee boot iha TL nian laran,” hatete Eis Primeiru Ministru, Alkatiri.
Planu ba programa nee rasik, hatete Eis Primeiru Ministru, Alkatiri katak hanesan preparasaun nebee  hahu ona ba Oecusse nian, nebee hahu ho master plan. Ho nunee, iha loron 21 fulan Maio nee, Eis Primeiru Ministru Marii Alkatiri sei ba Distritu Oecusse hodi konsulta ho komunidade, alem nee ekipa balun sei tun ba Oecusse hodi konsulta  klean liu ho populasaun iha suku 18 inklui intelektuais Oecusse oan sira.

Nunee mos, Sekretariu Estadu Politika Formasaun Profesional (SEPFOPE), Ilidio Ximenes da Costa, nebe remata hasoru malu ho Eis Primeiru Ministru, Marii Alkatiri, hatete inkontru ida nee, koalia konaba preparasaun planu master plan, ba distritu Oecusse no koalia mos  konaba zona ekonomia social ba merkadu TL. SEPFOPE mos iha hanoin koalia ho Eis Primeiru Ministru konaba SEPFOPE ninia hareee konaba formasaun saida maka atu hahu iha fatin neba. “Tanba master plan nee koalia konaba longu prazu, maka iha kurtu prazu SEPFOPE ninia preparasaun saida, maka, liu husi diskussaun nebee halao nee mosu asuntu importante tolu mak hanesan primeiru formasuan tenke hahu agora, segundu koalia konaba auto empregu nebee importante tanba sei fo servisu ba komunidade, terceiru oinsa dezenvolve centru formasuan komunitaria hodi nunee bele responde nesecidade merkadu,” hatete SEPFOPE Ilidio. SEPFOPE Ilidio, mos hatutan tan katak implematasuan harii sidade foun nee presija ema rihun 6, hodi halao servisu. Tanba nee agora dadaun SEPFOPE sei identifika hodi halo buat ruma. arm

2 COMMENTS

  1. This is a great idea, but must be proved as soon as possible, so as not to burden the mind of government officials, because only false promises to the people of Timor Leste

LEAVE A REPLY

Please enter your comment!
Please enter your name here